اسلام آباد۔ 06اپریل (اے پی پی) وزیر خارجہ مخدوم شاہ محمود قریشی پارینے کہ روس ڈیہہ نا بھاز اہم ءُ ملک اسے، روس اتون ننا ہڑتوم آ کنڈآتا تعلقداری اسہ پوسکن ءُ رخ اس اختیار کننگ ءِ۔ سے شنبے نادے آ روس انا وزیر خارجہ سرگئی لاروف نا دورہ پاکستان نا بابت اہم ویڈیو بیان اٹی وزیر خارجہ پارے کہ روس انا وزیر خارجہ سرگئی لاروف اینو پاکستان آ بننگ ءِ۔ دا روسی وزیر خارجہ اسے نا 9سال آن پد پاکستان نا دورہ ءِ۔ داہیت آن ہچ کس اختلاف کننگ کپک کہ روس دا ڈیہہ نا بھاز اہم ءُ ملک اسے۔ دادورہ داہیت انا ڈیک ءِ تننگ ءِ کہ روس اتون ننا ہڑتوم آ کنڈآتا تعلقداری اسہ پوسکن ءُ رخ اس اختیار کننگ ءِ۔ اوپارے کہ ننا ہڑتوم آ کنڈآتا تعلقداری ٹی گچینی بننگ ءِ۔ نن اسہ ایلو تون ڈیہہ ٹی کمکاری نا ارادہ تخنہ۔ نن ہُننگ اُن کہ ننا زرگزرانی و دفاعی تعلقداری امر مون آ ہِننگ ءِ۔ اوپارے کہ نارتھ ساؤتھ گیس پیپ لین ڈٹ ءِ نن ہڑتوم آک مون آ دننگ خوانہ۔ ننا داڑے ہراتم نُت انا تنکی ودی مس تو روس ننے وخت آ خولم فراوان کرے تانکہ ننا نہاد آک سوگو سلر۔ روسی وزیر خارجہ تون ہڑتوم آ کنڈآتا واپار نا مون آ دننگ نا بابت گپ وتران مریک۔ شاہ محمود قریشی پارے کہ اسٹیل مل اوفک خلکوسر اگہ دانا بحالی کن زرکاری نادروشم پیش تمے یا پین زرکاری نا سبیل اس پیش تمک تو ہڑتوم آ کنڈآتا کمکاری ءِ ودفنگ نا جوان ءُ وارخواہی اس ننے دوبننگ کیک۔ پاکستان و روس، اواری اٹ اوغان امن عمل اٹ کڑد ادا کننگ ءُ۔ اوپارے کہ روس انا وزیر خارجہ دہلی آن مرسا بننگ ءِ ہندوستان تون روس انا دیرینہ تعلقداری ءِ، روس بھارت ءِ اوغانستان اٹی امن کن مثبت کڑد ادا کننگ آرضامند کننگ کیک۔ کنے خوشی ءِ کہ روسی وزیر خارجہ پاکستان آ بننگ ءِ ای اودے بخیر کننگ کن تینٹ بالی پٹ آ کاوہ۔
