اسلام آباد۔ 06اپریل (ا ے پی پی) بینک و مالیاتی ادارہ غاک اسٹیٹ بینک آف پاکستان نا کوویڈ۔ 19تون مون تننگ نا ری فنانس فیسلیٹی فار کمبیٹنگ کوویڈ (آرایف سی سی) نا رداٹ ہسپتال، میڈیکل سینٹر آتے کن 10 ارب روپئی آن زیات نا وام تا منظوری ءِ تسنے۔ اسٹیٹ بینک آف پاکستان (ایس بی پی) نا حوال نارداٹ تدوک آ اسہ سال اٹی جم وڑاٹ 48 چندی ہسپتال و طبی ہند آتا کنڈآن 16.668ارب روپئی نا وام اکن آر ایف سی سی نا رداٹ اپلائی کرینو۔ رسینگوک آ درخواست آتیان اسکیم نا رداٹ بینک و مالیاتی ادارہ غاتا کنڈآن داتم اسکان وام نا دوئی کننگ نا 44 درخواست آتے منظور کرسا ہسپتال و طبی ہند آتیکن 10.523ارب روپئی نا وام تا منظوری ءِ تننگانے۔ یات سلے کہ آسان شڑت و کم ترین شرح سود آ آر ایف سی سی نا رداٹ ہسپتال و طبی ہند 30جون 2021اسکان درخواست آتے جمع کرفنگ کیرہ۔ حوال نار داٹ اسکیم نا بناء آ بنائی وڑاٹ ہسپتال و طبی ہند آتیکن آر ایف سی سی نا رداٹ زیات آن زیات 200ملین روپئی نا وام تا حد مقرر کننگاسس۔ اوکان پد پوسکن آ ہسپتال و طبی ہند آتا تفنگ پین پین نا گرج آتا رداٹ اسٹیٹ بینک آف پاکستان وام تا مقررہ حد اٹ ودکی کرسا وام تا حد ءِ اسہ ارب روپئی اسکان ودفیسس۔
