اسلام آباد۔ 05اپریل (اے پی پی) سینیٹ اٹی قائد حزب اختلاف سینیٹر سیدیوسف رضاگیلانی پارینے کہ نن السی فائدہ کن ایوان اٹ تولوک اُن، الس ءِ ریلیف تننگ و ایوان نا تقدس کن نن غٹ متحد اُن۔ دوشنبے نادے آ ایوان نا دیوان اٹی نقطہ اعتراض آ گپ وتران کرسا اوپارے کہ پوسکن گچین مروک آ سینیٹر آتے مبارکبادی ایتیوہ۔ داباسک آتا ایوان اٹ اہم ءُ کڑد اسے۔ اومیت ءِ کہ پوسکن گچین مروک آ سینیٹ نا باسک آک سینئر سینیٹر آتا راہشونی آن فائدہ ہرفرہ۔ اوپارے کہ چنکا صوبہ غاتا احساس محرومی ءِ چٹفنگ کن دابڑزکو ایوان جوڑ مس۔ نن السی فائدہ کن داڑے تولوک اُن۔ السی است خواہی تا ترجمانی ءِ کننگ ننا فرض ءِ۔ اوپارے کہ پی ڈی ایم نا مخ تفی اٹ سینیٹر جوڑ مسونٹ۔ ایوان اٹ مچ آ اپوزیشن ءِ اوار ہلسا کاوہ۔ اوپارے کہ آئینی حق، زرگزرانی حق، انسانی حق، کبینی وبے روزگاری نا چٹفنگ، زالبول، ملازم و کشارگر آتا حق انا توار کن پی ڈی ایم جوڑ مس۔ اختلاف رائے جمہوریت نا حسن ءِ۔ ننا مسخت الس ءِ ریلیف تننگ ءِ، داڑکن نن اسٹ اُن۔
