وزیر خارجہ نا وزیراعلیٰ پنجاب تون اوڑدہی، سویلی پنجاب سیکرٹریٹ و شونداری ڈٹ آتیا گپ وتران

اسلام آباد۔ 05اپریل (اے پی پی) وزیر خارجہ مخدوم شاہ محمود قریشی وزیراعلیٰ پنجاب سردار عثمان بزدار تون دوشنبے نادے آ وزیراعلیٰ آفس اٹی اوڑدہی کرے۔ ہیت وگپ اٹی سویلی پنجاب سیکرٹریٹ، شونداری ڈٹ و ایلو باندات آ گپ وتران کننگا۔ وزیراعلیٰ پنجاب وزیر خارجہ ءِ سویلی پنجاب سیکرٹریٹ نا بابت معلومدار کرے و پارے کہ سویلی پنجاب پاکستان تحریک انصاف نا دور حکومت اٹ ریکارڈ شون ہلیک۔ عثمان بزدار پارے کہ اسکول آتا اپ گریڈیشن اٹ سویلی پنجاب ءِ 38درسد بشخ تننگانے۔ عثمان بزدار سویلی پنجاب سیکرٹریٹ ءِ چٹفنگ نا پروپیگنڈا شکست خوردہ زموارآک تالان کننگ ءُ۔ پاکستان تحریک انصاف ءِ سویلی پنجاب اٹی الس فیصلہ کن برتری تس۔ وزیراعلیٰ پارے کہ پی ٹی آئی سویلی پنجاب تون اوار غٹ پسماندہ علاقہ غاتا محرومی تا ازالہ ءِ کیک۔ سویلی پنجاب ءِ صوبہ اس جوڑ کننگ نا شرف ہم پاکستان تحریک انصاف ءِ دوئی مریک۔ سویلی پنجاب نا سیکرٹری تے واکدار کننگ اُن تانکہ الس ءِ لاہور آ بروئی تمپ۔ عثمان بزدار پارے کہ باقاعدگی اٹ ہر تُو ملتان آ ہنسا شونداری ڈٹ و ایلو باندات آتا جاچ ءِ ہلیوہ۔ کابینہ دیوان ہم ملتان اٹی مریک، صوبائی وزیر آک اسہ، اسہ دے سویلی پنجاب اٹی تولرہ۔ سویلی پنجاب نا 70سالہ محرومی تاازالہ ءِ کننگ خوانہ۔ عثمان بزدار پارے کہ سویلی پنجاب نا ورناتیکن ملازمت آتا کوٹہ مخصوص کننگ کن کانود سازی کننگ انگ ءِ۔ وزیر خارجہ پارے کہ سویلی پنجاب سیکرٹریٹ نا معاملہ غا وزیراعلیٰ پنجاب نا دمدستی ایکشن ستاکڑزک۔ شاہ محمودقریشی پارے کہ وزیراعلیٰ عثمان بزدار وخت آ ایکشن ہلسا پروپیگنڈا و ہوکاتے چٹفینے۔ ملتان تون اوار سویلی پنجاب نا مخلوق نا محرومی تا ازالہ نا دور بناکرینے۔ وزیر خارجہ پارے کہ کس اسے سویلی پنجاب نا بارواٹ ہوکاتالان کننگ نا موکل تفنہ۔