اسلام آباد۔ 05اپریل (اے پی پی) قومی اسمبلی نا خصوصی کمیٹی کشاری مصنوعات نا دیوان دوشنبے نادے آ اسپیکر قومی اسمبلی اسد قیصر نا کماشی ٹی پارلیمنٹ ہاؤس اٹی مس۔ دیوان اٹی مچ آ ملک اٹی موسمیاتی بدلی نا سوب آن چنکا بزغر آتا مروک آ نسخان نا ازالہ ءِ کننگ کن گام گیج و کشت وکشار نا بشخ انا شونداری و کشاری مصنوعات اٹی ودکی کن آخبت کن لائحہ عمل آ سجفنگا۔ وزیراعظم نا خصوصی کمکار امور نوجوانان عثمان ڈار سرسہب ورنا و سرسہب بزغر پروگرام نا بابت کمیٹی ءِ حوال تس و اوپارے کہ سرسہب ورنا پروگرام نا بھاز جوان ءُ فیڈ بیک اس مون آ بسنے بزغرآتے شونہال کننگ اٹ ورناتا کڑد کلیدی اہمیت تخوک تکنگک۔ سرسہب ورنا پروگرام نا کمک اٹ 45سال آن کم وئی نا ورناتے وام تننگک۔ 15آن 20ڈسٹرکٹ اٹی داپروگرام نا بناءِ کننگک۔ سرسہب ورنا نا کمک اٹ ورناتے ٹریننگ تننگ انگ ءِ۔ شونہال بزغر و شونہال پاکستان ساڑی حکومت نا اولیت ءِ، عثمان ڈار پارے کہ سرسہب ورنا پروگرام اسکلز فار آل پروگرام سرسہبی اٹ برجاءِ۔ اسہ لکھ آن دہ لکھ اسکان ہراوام تے تننگک اوفتیا 3پرسنٹ چارج کننگک۔ اوپارے کہ ارٹ میکو ریسہ ٹی 10لکھ آن 1کروڑ اسکان وام تیا 4 درسدچارج مریک۔ مسٹ میکو ٹیر اٹی اسہ کروڑ آن دونیم کروڑ اسکان وام آ 5درسد چارج کننگک، کشت وکشار نا بشخ ءِ گچین کننگ کن ورناتا کڑد بھاز اہمیت تخک۔ داکمیٹی نا کمک اٹ سرسہب ورناتے بھاز اہمیت دوئی مریک۔ کشاری مصنوعات آتا کمیٹی نا توسط اٹ ای باور کرفیوہ کہ شونہال بزغر و شونہال ورناپروگرام آ من وعن عمل کننگک۔ شندانہ گلزار پارے کہ 12مارچ 2020ء آ کمیٹی کشت وکشار و خور انا ویل آتا ایسری کن اولیتی بنداو تیا گام گیج ہرفنگ نا بناءِ کریسس۔ سرسہب ورنا، سرسہب بزغر، احساس پروگرامز وسی پیک ساڑی حکومت نمان پروگرام تیٹی اوار ءُ۔ بنجائی وزیر ڈاکٹر فہمیدہ مرزا پارے کہ ہراتم اسکان پارلیمنٹ نا گچین مروک آ نمائندہ غاتے پت اٹ ہلنگپک دابشخ ءِ شون ترفنگ آسان مفک۔ ماحولیاتی بدلی نا سوب آن پیش بروک آ ویل غٹ صوبہ غاتے مون تروک ءِ۔ کمیٹی نا باسک احسان اللہ ٹوانہ پارے کہ موسمیاتی بدلی نا سوب آن پِریاتو بھاز کم مریکیا بھاز زیات مریک۔ تھل انا علاقہ ءِ پدریسہ بھسکاری مون تروک ءِ۔ بارانی علاقہ غاتیٹی پِرمفننگ فصل آتا تباہی نا غٹ آن بھلا سوب ءِ۔ کمیٹی پارے کہ کشت وکشار نا بشخ ءِ پدریسہ گوجالنگ انگ ءِ۔ اسپکر پارے کہ احسان اللہ ٹوانہ نا تھل انا علاقہ نا بابت چکاری نوٹس ءِ خاص وڑاٹ ہُننگے۔ تھل ماحولیاتی بدلی نا سوب آن غٹ آن زیات زہمی مروک آ علاقہ ءِ۔ سید فخر امام پارے کہ 16ستمبر 2019ء آ خولم نا نہاد ءِ ودفنگا۔ 1750روپئی فی من نا سمری ءِ بنجانا مون آ تخنگا۔ سندھ اٹی خولم نا نہاد 2000روپئی من مننگ نا سوب آن پنجاب اٹی 1800روپئی فی من کروئی تما۔ اسپیکر پارے کہ کمیٹی نا سلاہ و سوج آتیا من و عن عملدرآمد نا گرج ءِ۔
