اسلام آباد۔ 05اپریل (اے پی پی) بڑزکو ایوان الس ءِ انسداد کورونا ویکسین نا مفت یا جہانی منڈی نا رداٹ اصل نہاد آ فراوانی نا قرارداد ءِ گیشتری سلاہ اٹ منظور کرے۔ قرارداد نا مخ تفی ٹی 43و مخالفت اٹ 31وونٹ تما۔ دوشنبے نادے آ ایوان بالا ٹی سینیٹر کامران مرتضیٰ قرارداد پیش کرے کہ کورونا دین اتون مون تننگ کن غٹ ملک آک تینا شاری تے مفت ٹیکہ جات خلفنگ کن تینا وسیلہ غاتے منتقل کننگ کن متاماری کننگ ءُ وخت اس کہ ملک اٹی بیرہ بزرگ شاری و فرنٹ لائن ہیلتھ ورکرآتے ٹیکہ خلنگ ءِ اولیت تننگانے۔ روسی ساختہ انسداد کورونا ویکسینسپٹنک نجی فرم ءِ درآمد کننگ نا موکل تسنے و جہانی منڈی نا نہاد 1500روپئی نا برعکس اونا اِرا خور انا نہاد 8400روپئی مقرر کننگانے۔ الس کن ممکن اف کہ انسداد کورونا نا ویکسین نا بھاز زیات نہاد ادا کیر۔ قرارداد اٹی زور شاغنگانے کہ حکومت الس ءِ انسداد کورونا ویکسین نا مفت یا جہانی منڈی نا رداٹ اصل نہاد آ فراوان کے۔ قرارداد آ شرہ ٹی بشخ ہلسا قائد حزب اختلاف سیدیوسف رضاگیلانی پارے کہ کورونا دین انا دین جہانی ءُ دین اسے ہراڑآن غٹ زہمی مننگ ءُ۔ کورونا غان بچنگ کن گچین گام گیج کننگ نا گرج ءِ۔ ہربندغ ءِ ویکسین نا فراوانی ءِ پک کننگے۔ سینیٹر شیری رحمان پارے کہ کورونا دین انا مسٹ میکو ریسہ خطرناک ءِ۔ داڑتون مون تننگ کن دمدستی گام گیج کننگے۔ اوکان پد چیئرمین سینیٹ قرارداد آ وونٹنگ کرفے۔ قرارداد نا مخ تفی ٹی 43و مخالفت اٹ 31وونٹ تما۔
