اسلام آباد۔ 05اپریل (اے پی پی) پارلیمانی سیکرٹری قومی جان جوڑی خذمت ڈاکٹر نوشین حامد دوشنبے نادے آ پارے کہ کوویڈ۔ 19ویکسین نا 9لکھ آن زیات خور پاکستان ءِ تننگانے۔ تینا اسہ بیان اسے ٹی اوپارے کہ سرکاری ہندآتا گچین کروک آتے دا ویکسین بے معاوضہ غان ملک۔ اوپارے کہ پنجا سال انا وئی آن زیات مخلوق کن درج انا عمل بناکرینے وخت اس کہ 60آن زیات وئی نا بندغ و فرنٹ لائن ہیلتھ ورکرآتیکن ٹیکہ خلنگ نا مہم مہالو آن جاری ءِ۔ اومستی پارے، نن دا عمل ءِ ترند کننگ اُن و دادے اسہ ہندن ءُ ریسہ سے آ دننگ خوانہ ہراڑے پاکستانی تا اسہ بھلو کچ اسے ویکسین کننگے تانکہ دینی مرض ءِ تالانی آن توننگ اٹ کمک رسینگ کے۔ اوپارے کہ داوخت آ حکومت نا کنڈآن شاری تے ویکسین مفت فراوان کننگ انگ ءِ و روسی ساختہ اسپاٹونک وی ویکسین کن نجی سرٹیفائیڈ ہسپتال آتیان ہم گڑاس ءِ موکل تننگانے۔ اوداہم پارے کہ بدبختی اٹ الس نا غیر سنجیدہ سلوک نا سوب آن، کورونا دین انا انفیکشن اٹ مثبت تناسب ودسا ہِننگ ءِ، اومستی پارے، ویکسینیشن نا بناٹی مخلوق نا رجسٹریشن سست ئس ولے داسہ کرار کرار آ مخلوق معلومدار ءِ و تینا رجسٹریشن ءِ کرفنگ ءُ۔ اومستی پارے کہ کم و ود 78درسد بندغ سرکاری ویکسینیشن ہند آتے ٹی تینا رجسٹریشن ءِ کرینو۔ اومستی پارے کہ بنجائی حکومت غٹ صوبہ غاتے کورونا دین آن بچفنگ کن 25,000نا ہدف تسنے۔ ہراٹی پنجاب حکومت یک شنبے اسکان تینا 26,000بندغ آتا ویکسینیشن کرینے۔ اسہ سوج اسے نا ورندی ٹی،اوپارے کہ حکومت 2021ء نا ایسر اسکان ہدف نا 70درسد آبادی ءِ کورونا دین آن بچفنگ کن سنبرینگوک ءِ۔
