کراچی۔3اپریل (اے پی پی): منصوبہ بندی ءُ دیمروئی ءِ بنجاہی وزیر اسد عمر ءَ جار جتگ کہ کراچی پیکج ءِ حاسیں منصوبہ ہمےسال ءَ سرجم کنگ بنت، کراچی ءَ گرین لائن بس سروس اگست ءَ بندات بیت۔ محمود آباد، گجر ءُ اورنگی ءَ ہوار ایندگہ کور ءُ شیپانی ساپ کنگ ءِ زمہ واری بنجاہ ءَزُرتگ بوتگ اے کار جولائی ءَ سرجم بیت۔ اے ھیالانی درشانی آئی ءَ شمبے ءِ روچءَ فیڈریشن آف پاکستان چمیبر آف کامرس اینڈ انڈسٹریز(ایف پی سی سی آئی ) ءِ ترءُ تاب ءِ موہ ءَ گوں صحافی آں گپ ءُتران کنان ءَ کتگ۔ اے موہ ءَ ایف پی سی سی آئی ءِ صدر میاں ناصر حیات مگوں، سیکریٹری جنرل سیدمسعود عالم رضوی، کراچی چیمبر آف کامرس اینڈ انڈسٹری ءِ صدر ذکریا عثمان ءُ ایندگہ حاسیں بیپاری راہشون ہم ساڑی بوتگ اَنت ۔ آئی ءَ گشتگ کہ 130 ارب کلدار ءِ حرچ ءَ چہ کراچی پورٹ ءَ تاں پپری کنٹینرز ءِ ھاترءَ جتاہیں ریلوے لائن جوڑ کنگ بیت، آئی ءَ گشتگ کہ کراچی سرکلر ریلوے ءِ ڈیزائن سرجم کنگ بوتگ ءُ ہمے سال ءَ ٹینڈر جاری کنگ بیت۔
