اسلام آباد۔ 02اپریل (اے پی پی) بنجائی وزیر داخلہ شیخ رشید احمد پارینے کہ سیاچن بارڈرآ اسکاؤٹ بھلو نرزوری اسے نا درشانیءِ کننگ ءِ، گلگت بلتستان اٹی امن و ایمنی نا بابت سی جی بی اسکاؤٹس نا کڑد ستاکڑزک۔ داخیال آتا درشانی ءِ او جمعہ نادے آ گلگت بلتستان اسکاؤٹس ہیڈکوارٹر آ بننگ آ کرے۔ اسکاؤٹس ہیڈ کوارٹر آ بننگ آ وزیر داخلہ ءِ سلامی تننگا۔ وزیر داخلہ یات گار شہداء آ پھل شاغا۔ داوخت آ وزیر داخلہ شیخ رشید ءِ جی بی اسکاؤٹس نا بابت حوال تننگا۔ حوال اٹی ڈائریکٹر جنرل جی بی اسکاؤٹس ضیاء الرحمان ئسک ہم ساڑی ئس۔ وزیر داخلہ جی بی اسکاؤٹس نا گلگت بلتستان نا بابت خذمت آتا ستاءِ کرسا پارے کہ سیاچن بارڈر آ اسکاؤٹس بھلو نرزوری اسے نا درشانی ءِ کننگ ءِ۔ گلگت بلتستان اٹی امن وا یمنی نا بابت سی جی بی اسکاؤٹس نا کڑد ستاکڑزک۔ اوپارے کہ گلگت بلتستان ءِ پاکستان نا قومی دنگ اٹ اوار کننگ اُن۔ گلگت بلتستان پاکستان نا شونداری ٹی بنداوی کڑد ادا کننگ ءِ۔ شیخ رشید احمد پارے کہ دیامیر بھاشا ڈیم پورو مننگ آن پاکستان نا دیر و توانائی نا ویل آک چٹرہ۔
