اسلام آباد۔ 02اپریل (اے پی پی) بنجائی وزیر کانود و انصاف بیرسٹر ڈاکٹر فروغ نسیم صوبائی حکومت آتے پارت کرینے کہ جنسی ڈوہ و ریپ انا واقعہ غاتا توننگ کن سرکاری ہسپتال آتے ٹی ضلع نا کہول آ ”ریپ کرائسزسیل“ جوڑ کننگے۔ وزارت کانود و انصاف نا کنڈآن جاری بیان اٹی پاننگانے کہ بنجائی وزیر کانود ڈاکٹر فروغ نسیم نا کماشی ٹی بڑزکو کہول انا دیوان تدوک آ دے اسلام آباد اٹی مس ہراٹی وزارت کانود نا بڑزکو کمامدار، صوبائی چیف سیکرٹریز، محکمہ داخلہ و پولیس نا بڑزکو کمامدارآک ہم ساڑی ئسر۔ دیوان اٹی جنسی ڈوہ و ریپ انا واقعہ غاتا توننگ کن بنجائی حکومت نا کنڈآن نافذ کروک آ کانود آ عملدرآمد ءِ پک کننگ نا بابت امور آ سرجم گپ وتران کننگا۔ دیوان اٹی بشخ ہلوک آتیان تران کرسا بنجائی وزیر کانود نا پاننگ ئس کہ کانود آ عملدرآمد کن ”ریپ دری کرائسز سیل“ و اسیجائی جاست وپاستی ٹیم تا ٹہیفنگ اہم ءُ حیثیت اس تخک، دارداٹ ہروڑنا ڈیوالئی نا منفی نتیجہ برآمد مننگ کیک۔ اوپارے کہ غٹ صوبہ غاتے ”انسداد ریپ کرائسز سیل“ اکن فوکل پرسن پندار کروئی مریک، داڑتون اوار اوار ضلع نا کہول آ کمشنر یا ڈپٹی کمشنر ءِ سیل انا سروک پندار کنننگے تانکہ ہندا سیل باضابطہ کاریم نا بناءِ کننگ کے۔ بنجائی وزیر کانود نا پاننگ ئس کہ دا سیل زہمی بندغ آتا طبی معائنہ و واقعہ نا جاگہ غان دمدستی شاہدی یکجا کننگ کن کاریم کیک۔ اوپارے کہ اسیجائی جاست وپاستی ٹیم انا سروک ضلعی پولیس آفیسر مریک وخت اس کہ ایس پی، ڈی ایس پی و ایس ایچ او تون اسہ زالبول پولیس آفیسرباسک مریک۔ بیرسٹر فروغ نسیم پارے کہ ریپ و جنسی ڈوہ انا بابت صوبہ غاتا کنڈآن تروک آ حساب وکتاب”اینٹی ریپ“ کانود آ جوان وڑاٹ عملدرآمد اٹ کمکار مریک۔ داوخت آ پنجاب نا وزیر کانود راجہ بشارت باوری کرفے کہ پنجاب نا غٹ ڈسٹرکٹ ہیڈکوارٹرز ہسپتال آتے ٹی ”انسداد ریپ کرائسز سیل“ انا جوڑ کننگ نا پرمان جاری کننگک۔ اوپارے کہ جنسی ڈوہ و عصمت دری نا برخلاف جوڑ کروک آ کانود نا گچین نافذ کننگ کن صوبائی حکومت تینا پبی کڑد ءِ ادا کیک۔ انسداد ریپ انا بابت جوڑ خصوصی کمیٹی نا سروک و پارلیمانی سیکرٹری کانود و انصاف بیرسٹر ملیکہ بخاری بشخ ہلوک آتے معلومدار کرے کہ کانود نا نافذ کننگ اٹ پیش رفت نا جاچ ءِ ہلنگ کن او جندانا وڑاٹ بروک آ ہفتہ غان صوبہ غاتا دورہ ءِ کیک۔ اوپراے کہ ساڑی ٹی پیش بروک آ عصمت دری نا واقعہ غاتا برخلاف مقدمہ غاک عدالت آتیٹی سماعت مننگ ءُ۔ ڈوہ اٹ اواربندغ آتا برخلاف کانود نا رداٹ کارروائی کننگے۔ ملیکہ بخاری پارے کہ صوبائی حکومت آتے ہم پوسکن آ کانود نا نافذ کننگ آ دمدستی وڑاٹ کاریم ءِ بناکروئی مریک۔
