اسلام آباد۔ 02اپریل (اے پی پی) قومی اسمبلی ءِ پاننگانے کہ ریاست مدینہ نا ویژن نا رداٹ وزیراعظم پاکستان تینے الس نا مون آ جوابدہ تکک و ہندا ویژن نا رداٹ او ٹیلی فون لائن نا کمک اٹ الس تون براہ راست رابطہ نا گام ءِ ہرفینے۔ جمعہ نادے آ قومی اسمبلی ٹی شاہدہ رحمانی نا سوج آ پارلیمانی امور نا وزیر مملکت علی محمد خان ایوان ءِ پارے کہ وزیراعظم پاکستان غٹ انا وزیراعظم ءِ، نواز شریف مستین اٹ ہم داگام ءِ ہرفیسس، وزیراعظم آن براہ راست سوج اسہ ملک اسے ٹی ہم مفک، داڑکن اسہ وڑوڈول اس مریک، نادرا غان پک کننگک، کالز بریک، اونا مانیٹرنگ ءِ کننگک و اوکان پد وزیراعظم ءِ داکال ٹرانسفر کننگک۔ اوٹی سیاسی پرخ ءِ ہُننگپک۔ اوپارے کہ وزیراعظم آن براہ راست سوج آتیکن 10ٹیل فون لائنز این ٹی سی سی آن ہلنگانے۔ مدینہ نا ریاست نا ویژن نا رداٹ وزیراعظم الس ءِ جوابدہ ءِ۔ مرتضیٰ جاوید عباسی نا سوج آ اوپارے کہ 22 کروڑ مخلوق نا ملک ءِ،م وزیراعظم ءِ ہرانا اولیکو کال بس اودے ہلنگا۔ اوٹی وی آئی پی نا خیال ءِ تخنگپک۔ اوپارے کہ ایبٹ آباد وہزارہ نا شونداری ڈٹ آتیکن فنڈ جاری کننگ انگ ءِ۔
