اسلام آباد۔ 02اپریل (اے پی پی) چین پاکستان اقتصادی راہداری ڈٹ انا رداٹ صنعتی شونداری وکشت و کشار آ چکار کننگ انگ ءِ۔ سی پیک اتھارٹی نا کمامدارآک اے پی پی ءِ پاریر کہ صنعت و کشت وکشار ہڑتوم آ بشخ آک پاکستان نا شونداری کن کلیدی اہمیت تخرہ۔ دا ہمو بشخ آک ءُ ہرافتے ٹی پاکستان وخت انا خواست آتا رداٹ شون ہلتنے و ہنداسوب آن پاکستان ءِ زرگزرانی مشکل مون تروک مسنے۔ سی پیک نا رداٹ ارٹ میکو ریسہ ٹی داہڑتوم آ بشخ آتیا خاص چکار کننگ انگ ءِ و دامسخت نا دوئی کننگ کن سرجم ءُ ڈٹ ترتیب تننگانے ہرافتیا کاریم نا بناءِ کننگانے۔ سی پیک نا ارٹ میکو ریسہ واپاری بے بریبری نا ویل انا مون ءِ توننگ اٹ بھاز کمکار مریک۔ ارٹ میکو ریسہ ٹی بنداوی پنجر نا شونداری نا کمک اٹ صنعتی شونداری، کشت وکشار نا میکا نائزیشن، سیل و سوات، ہائی ٹیک فنانس و راجی شونداری آ خاص چکار کننگ انگ ءِ۔ ملک انا تہہ ٹی خصوصی اقتصادی زون جوڑ کننگ انگ ءِ ہراڑآن پیدواری لائخی ودک، کثیر واپاری سرجزودی مریک و پاکستان نا برآمدآتیٹی ودکی مریک۔ پاکستان نا ودوک آ آبادی نا خور انا گرج آتے پورو کننگ کن کشت وکشار ءِ شون تننگ نا سخت گرج ءِ۔
