اورنگزیب اسلم بلوچ
اسلام آباد۔1اپریل (اے پی پی): ایش یک جوانیں ارزشتی ایں پسو ات کہ پاکستقان گچین کاری کار ءَ را ساپ ءُ سلہ ئی ءِ واستہ الیکٹرانک ووٹ دیگ ءِ کار رپک ءَ را جاڑی دار ایت وھیکہ ملک ءَ ووٹنگ مشنز جوڑ کنگ ءِ کار ترندی ءَ جاڑی انت۔ گوستگیں بازیں سال ءَ چہ گوستگیں حکومت آنی بازیں سبب آمہ رد ءَ ساپ ءُ سلہ ایں ووٹنگ ءِ نظام ءِ نیمگ ءَ نہ شتگ انت پدا ھم پاکستان تحریک انصاف ءِ حکومت ءَ اے جیڈھ ءِ سر ءَ وتارا جتا سہرا کتگ ءُ اے مشن ءِ نیمگ ءَ جنزگ ءَ وتی کوھنیں سیاسی نظام آں چہ کم تر پھم اتگ بوتگ۔
مزن وزیر عمران خان ءَ گوستگیں سال نومبر ءَ ساپ ءُ سلہ ایں لس گچین کاری ءِ برجائی ءِ واستہ الیکٹرانک ووٹنگ مشین ( ای وی ایم ) سہرا کنگ ءِ جزم ءِ درشان کتگ۔ راج ءَ گوں وتی گشتانک ءَ آئی ءَ گوشت کہ 2013 ءِ لس گچین کاری ءَ پاکستان تحریک انصاف ءِ گوما مسلم لیگ نواز، پاکستان پیپلز پارٹی ءَ ھم دھاندلی ءِ بھتام جتگ وھدیکہ ھمے بھتام 2018 ءِ گچین کاری کنگ بوتگ انت۔ آئی ءَ اے جزم ءِ درشان کت کہ اے گل پارلیمنٹ ءَ چہ الیکٹرانک ووٹنگ ءِ منظوری گرگ بوت۔ ایشی ءَ چہ نا ایوک ءَ ڈن ملک ءَ نندوکیں لکھانی پاکستانی وتی ووٹ ءِ ھک ءَ کارمرد کت کناں، بلکینگ ءَ ایش نوکیں ٹیکنالوجی گچین کاری ءَ را ساپ ءُ سلہ جوڑ کن انت۔ آئی ءَ گوشت کہ الیکٹرانک ووٹنگ مشین گچین کاری ءَ شکست ءَ چہ پد گچی کاری کار ءَ را فراڈ ءِ بھتام ءَ بندگ ءِ ھلاپ ءَ کمکار سہرا بنت۔
ملک ءَ ایش دھ سال ءَ پیسر ای وی ایم ءِ سر ءَ کار کنگ ءَ بندات کتگ بوتگ بلے گوستگیں حکومت ءِ ترس ءَ چہ ایشی ءَ سرجم بوت نہ کنت۔ نیشنل انسٹی ٹیوٹ آف الیکٹرانک (ایس آئی ای) ءَ نوکیں رسانکی نظام ءِ گوما نزیک کنگ ءِ واستہ کوھنیں سامان آناں اپ گریڈ کت
این آئی ای ءَ سائنسی ءُ ٹیکنالوجی ءِ وزیر ءِ بستار ءَ چوہدری فواد حسین ءَ ترندی ءَ گوں مٹ آورت۔ رزلٹ ٹرانسمیشن سسٹم (آر ٹی ایس ) سسٹم ءِ ناکامی ءَ را یک رند ءِ پدا کنگ مہ بیت، اے سسٹم 2018 ءِ لس گچین کاری ءَ گچین کاری آسر بزاں نتیجگ آنی انتظامی کار آنی بھر بوتگ۔
ڈائریکٹر جنرل انسٹیٹیوٹ آف الیکٹرانک( این آئی ای) عبد المجید سومرو ءَ گوشت کہ الیکشن کمیشن آف پاکستان (ای سی پی) ءَ اے ٹیکنالوجی ءَ را گچین کاری ءِ برجائی ءِ واستہ کارمرد کنگ ءِ پیسلہ کنگ ءَ چہ پد ای وی ایم ءِ اولی ورژن تیار کتگ ءُ ایشی ءِ تیاری ءِ واستہ ٹینڈر گوانک جتگ۔ این آئی ای ءَ میاں اوستمانی کمپنی آنی گوما ٹینڈر ءَ ھم بھر زرتگ بلے اے وھد ءَ پیسلہ بوت نہ کنت، ادارگ نوکیں لوٹ آنی رد ءَ ایشی ءِ اندر ءَ نوکیں ازم آنی گوما ایشی ءِ سر ءَ کار کنگ ءَ انت۔ وزیر برائے سائنس ءُ ٹینکالوجی چوہدری فواد حسین ءَ استیں وھد ءَ اے ٹیکنالوجی ءَ را گہتر جوڑ کنگ ءِ واستہ گیش شور ءُ سلاھ ءِ واستہ یک جھلی کمیٹی جوڑ کنگ بوتگ پدا ھم آیوکیں گچین کاری ءَ ایشی ءِ کارمردی بوت کنت۔
چوکہ اے مالومداری ڈیٹا سیکیورٹی ءِ ارزشت ءُ گچین کاری آسر آنی راستی آنی رد ءَ تیار کنگ بوتگ ھمے واستہ ای وی ایم ءِ وسیلگ ءَ جم کتگیں آسر آنی تہ ءَ دھاندلی ءِ امیت ءُ اوست آناں ھلاس کنگ ءِ واستہ مشین ءِ اندر ءَ چیریں بیلٹ پیپر ءِ وسیلگ ءَ ڈبل چیک ءُ تسدیک کنگ بیت کنت۔ این آئی ای چوہدری فواد حسین ءِ سرجمیں کمک ءَ چہ ڈیزائن ءِ گہتری آرگ ءِ ارادگ دار ایت۔
الیکشن کمیشن ءِ پیسریگیں سیکریٹری کنور محمد دلشاد ءَ گوشت کہ الیکٹرانک ووٹنگ مشین (ای وی ایم ) ءِ منصوبگ گوستگیں 15 سال ءَ چہ ای سی پی ءَ چار ءُ بچار ءِ تہ ءَ بوتگ بلے گوستگیں حکومت آنی واھگ نہ دارگ ءِ سبب ءَ اے کار ءَ دیمروئی نہ کتگ ، پمے ھاترا آ ای سی پی ءَ چہ کار گرگ ءَ بوتگ انت۔ آ وھد ءَ ای وی ایم ءِ سر ءَ باز کار گرگ بوتگ بلے آ وھدے حکومت ءِ ھک ءُ دل نہ بوتگ پمشکہ ایش دیم ءَ نہ جنز اتگ۔ آئی ءِ ھیال ءَ ای وی ایم گچین کاری دست مانجنی آناں گر ءُ دار ءِ واستہ المی انت۔
پاکستان تحریک انصاف ءِ سروک ، کنول شوذب ءَ گوشت کہ بھارت آباتی ءِ رد ءَ درستاں چہ مستریں ملک انت ءُ اگاں بھارت گچین کاری ءِ واستہ ای وی ایم ٹیکنالوجی وتی کت کنت گڈا پاکستان چیا اِناں؟ اے ٹیکنالوجی یورپ ءُ امریکہ ءَ ھوار سرجمیں دگنیا ءَ کار مرد بوھگ انت۔ ھمے سب انت کہ اے ملک آنی جمہوریت گیش دیمروئی کنگ ءَ انت۔ آئی ءَ گوشت کہ پاکستان ساپ ءُ سلہ ایں گچین کاری آسر آنی واستہ اے ٹیکنالوجی آنی کمک ءَ الم بہ زور ات۔ آئی ءَ گوشت کہ امریکہ ءَ 1910 ءَ چہ ووڈنگ ءِ میشن کارمرد کنگ بوھگ ءَ انت۔
یک نیمگ ءِ این آئی ای وتی مشین ءَ را آزمائینگ ءَ انت دومی نیمگ ءَ الیکشن کمیشن آف پاکستان ءَ ووٹنگ ءِ واستہ یک نظامے ءِ تجروبت کتگ۔ مزن وزیر عمران خان ءَ چار شمبے ءِ روچ ءَ کامسیٹ یونیورسٹی ءِ پٹ ءُ پول ءُ دیمروئی ءُ نیشنل انسٹی ٹیوٹ آف لیکٹرانک ءِ نیمگ ءَ تیار کتگیں الیکٹرانک ووٹنگ میشن ءِ اپ گریڈ ماڈل، ووٹنگ ءِ کار رپک ءُ مشین ءِ جتا جتائیں فیچرز آنی بابت ءَ سرجمیں بریفنگ دیگ بوت۔ اے موہ ءِ سر ءَ مزن وزیر ءَ گوشت کہ گوستگیں تجروبت آنی رد ءَ گچین کاری کار ءَ را ھمک رنگیں کار رپک ءِ وسیلگ ءَ ساپ ءُ سلہ ، محفوظ ءُ در ابید جوڑ کنگ ءِ ھوالگ ءَ الیکٹ4رانک ووٹنگ مشین سہرا کنگ ملک ءُ ملک ءَ جمہوریت ءِ سیت انت۔ حکومت اے ھوالگ ءَ جزمیگ انت۔
آیوکیں روچ ءَ اے مشین ھرچی پکوئیں رنگ ءُ داب آنی گوما دیم ءَ کیت، سما بیت کہ الیکٹرانک ووٹنگ ءِ آیوکیں باندات آزاتیں رنگ ءَ گچین کاری ءَ را دل یکیمی جوڑ کنت۔ آیوکیں باندات ءَ اے رنگیں الیکٹرانک مشین آنی کارمردی ءَ چہ جمہوریت ءَ را دیمروئی رسگ ءَ ھوار دھاندلی ءِ بھتام ءُ جاک آنی ھلاسی کنگ ءَ کمک رسیت۔ ایشی ءَ چہ سرجمیں کار آماچ بوھگ ءَ ھوار راجی دیمروئی ءَ را تاوان رس ایت۔
