اسلام آباد۔ 01اپریل (اے پی پی) اسپیکر قومی اسمبلی اسد قیصر تون پنچ شنبے نادے آ چیئرمین سینیٹ صادق سنجرانی اوڑدہی کرے ہراٹی قائد ایوان سینیٹ ڈاکٹر شہزادہ وسیم ہم ساڑی ئس۔ اوڑدہی ٹی ملکی سیاسی و پارلیمانی امور تون اوار ایلو اہم باندات آ گپ وتران کننگا۔ اسپیکر پارے کہ ملک ءِ مون تروک چیلنج آتون مون تننگ کن حزب اقتدار و حزب اختلاف ءِ کڑد ادا کروئی مریک۔ یوان اٹی خوشگوار چاگڑد اٹ شرہ و کانودی سازی پارلیمان نا تکریم اٹ ودکی کیک، ساڑی گچین کاری عمل اٹ شفافیت وخت انا اہم ءُ گرج اسے۔ اپوزیشن ءِ پارلیمانی کمیٹی نا جوڑ کننگ کن چھٹی اس نوشتہ کرینن ورندی نا انتظار ءِ۔ آخبت کن گچین کاری عمل آ پت ءِ بحال کننگ اپوزیشن و حکومت نا اسیجائی زمواری ءِ۔ اسد قیصر پارے کہ گچین کاری اصلاحات کن پارلیمانی کمیٹی نا جوڑ کننگ نا اپوزیشن نا کنڈآن پن ملنگ آ نوٹیفکیشن جاری کننگک۔ سینیٹ اٹ قائد حزب اختلاف تون رابطہ خوش آئند ئس۔ پیپلزپارٹی نا قومی اسمبلی ٹی چاگڑد ءِ سازگار کننگ و تینا کمکاری نا باوری کرفنگ ستاکڑزک۔ پی پی پی نا کنڈآن ایوان نا چاگڑد ءِ خوشگوار کننگ کن تینا کمک نا باوری کرفنگ و دا چرجوئی ٹی سید نوید قمر نا بطور فوکل پرسن تقر رسیاسی بالغ نظری نا درشانی ءِ۔ چیئرمین سینیٹ اسپیکر قومی اسمبلی نا پارلیمانی نظام ءِ پین سوگو کننگ کن کوشست آتا ستاءِ کرے و پارے کہ گچین کاری اصلاحات وخت انا اہم ءُ گرج اسے و کمیٹی نا زوت ٹہیفنگ مثبت ءُ گام اس مریک۔ قائد ایوان سینیٹ ڈاکٹر شہزاد وسیم پارے کہ حکومت پارلیمانی نظام نا سوگوی کن غٹ تر باندات آتے افہام و تفہیم اٹ ایسر کننگ خواہک۔
