اسلام آباد۔ 01اپریل (اے پی پی) صدر آزاد کشمیر سردار مسعود خان پارینے کہ دنیا ءِ جنگ و جھیڑہ غاتیان بچفنگ کن بین المذاہب ہم آہنگی ءِ مون آ درسا دنیا ٹی چندی تہذیب و مذہب آتا منوک آتا نیام اٹ امن واسہ ایلو ءِ سگنگ نا چاگڑد اس ودی کننگ المی ءِ۔ بھارت نا بی جے پی و آر ایس ایس نا انتہاپسند سرکار مسلمان و ایلو مذہب آتا منوک آتے ظلم انا شست کننگ ءِ انتئے کہ او داہیت آ یخین تخرہ کہ ہندوستان بیرہ ہندوتا ملک ءِ ہراڑے پین مذہب اسے نا منوک آتے رہینگ انگ نا ہچ ءُ حق اس اف۔ داخیال آتا درشانی ءِ او ”ڈوہ انا توننگ اٹ مذہبی راہشون تا کڑد“ انا سرحال آ ورچوئل کانفرنس آن تران کرسا کرے ہرانا بست وبند ءِ یونیورسل پیس فاؤنڈیشن، انٹرنیشنل ایسوسی ایشن آف پارلیمنٹرین فارپیس و ویانا آسٹریا ٹی جوڑ ایل آئی او ایس سائل پنی ءُ تنظیم اس اسیجائی وڑاٹ کریسر۔ جہانی پیس و بین المذاہب ہم آہنگی نا علمبردار ڈاکٹر محمد افسر راٹھور نا میزبانی ٹی مروک آ کانفرنس آن صدر ریاست آن بیدس پاکستان نا وزارت مذہبی امور بین المذاہب ہم آہنگی نا پارلیمانی سیکرٹری شنیلہ رتھ پنجاب نا وزیر کشت وکشار سید حسین جہانیاں گردیزی، بنجائی وزارت انسانی حق انا پارلیمانی سیکرٹری لال چند ملہی، لاہور نا آرچ بشپ، سبساٹین فرانسس شا، ریمیش سنگھ ارورہ ممبر پنجاب اسمبلی و ایلو ترانکارآک ہم ترا ن کریر۔ تینا تران اٹی صدر آزاد کشمیر سردار مسعود خان پارے کہ نیامی افریقہ، میانمار، فلسطین و بھارت نا کوزہ ٹی جموں و کشمیر اٹی مذہب نا بنداو آ پرخ ءِ پیدوار وڑاٹ ہُننگ مریک و داپرخ ہی درحقیقت داعلاقہ غاتیٹی جھیڑہ غاتا بنداوی سوب ءِ۔
