اسلام آباد۔ 01اپریل (اے پی پی) وزیراعظم نا خصوصی کمکار سی ڈی اے امور علی نواز اعوان پارینے کہ دا ننا حکومت نا پالیسی تا بھرم ءِ کہ بھارتی وزیراعظم عمران خان ءِ یوم پاکستان نا مبارکبادی تننگ ءِ، اینو پاکستان نا زرمبادلہ نا کوڑی 23ارب ڈالر نا حد ءِ سرمننگ ءِ، 25سال آن پد راول ڈیم آن اسلام آباد ءِ 2ایم جی ڈی دیر انا فراوانی اینو آن بناکیک۔ داخیال آتا درشانی ءِ او پنچ شنبے نادے آ داڑے راول ڈیم واٹر ورکس آ اسلام آباد ءِ راول ڈیم آن دیر انا سپلائی نا بنائی دود آن تران و اوکان پد میڈیا تون گپ وتران کرسا کرے۔ خصوصی کمکار علی نواز اعوان پارے کہ پاکستان تحریک انصاف نا حکومت نا پالیسی تا بھرم ءِ کہ بھارتی وزیراعظم عمران خان ءِ یوم پاکستان نا مبارکبادی نا چھٹی نوشتہ کننگ ءِ۔ میاں نواز شریف بھارتی وزیراعظم مودی و سجن جندال ءِ تینا اُرانا نجی دود آتے ٹی شریک کرسا کرے و ننا حکومت آ تنقید کننگ ءِ کہ نن بھارت آن بورہ انت اکن ہلنگ اُن۔ واپار ملکی فائدہ ٹی مریک و ننے بھارت آن بورہ اڑزان نہاد آ ملا ہنداخاطرآن ہلنگ اُن۔ اوپارے کہ نن تینا ہمسایہ ءِ بدل کننگ کپنہ ولے ہمسایہ تون جوان ءُ تعلقداری و ہیت و گپ اٹ مون آ ہِننگ مریک۔ وزیراعظم عمران خان کشمیر ءِ گیرام کتنے و نواز شریف آنبار حریت کانفرنس نا راہشون تتون اوڑدہی آن انکار کتنے۔ اسہ سوج اسے نا ورندی ٹی اوپارے کہ پی ڈی ایم داسہ پٹرولیم ڈیزل موومنٹ اس ہی رہینگانے انتئے کہ غٹ جماعت آک اسہ ایلو ءِ کن و خور نا چکر اٹی ءُ۔ علی نواز اعوان پارے کہ اینو ننا حکومت نا پالیسی تا سوب آن ڈالر 15روپئی کم مسنے و 125روپئی نا کچ آ بسنے ملکی زرمبادلہ نا کوڑی اولیکو وار 23ارب ڈالر نا حد ءِ سرمننگ ءِ۔ زرگزرانی ٹک آتیٹی گچینی بننگ ءِ پاکستان ہرادونیم ارب ڈالر نا بانڈ فلوٹ کریسس اونا سبسکرپشن 5 ارب ڈالر اسکان سرمسنے دا ہمو پت ءِ ہرا دنیا ءِ عمران خان آ ٹے۔ اوپارے کہ پاکستان نا دنیا تون گچین تعلقداری ءِ۔
