اسلام آباد۔ 01اپریل (اے پی پی) وزیراعظم نا خصوصی کمکار پٹرولیم تابش گوہر نا پاننگ ءِ کہ گردشی وام تا بہاؤ ٹی کمتی بسنے۔ اسہ انٹرویو اسے ٹی اوپارے کہ گردشی وام ہراداوخت آ کل 2300ارب روپئی ءُ، ہراٹی 1300ارب روپئی آئی پی پیز نا، ایلو پاور ہولڈنگ کمپنی ٹی قومی وامک ءُ سالانہ داوخت آ کیپیسٹی نا مد اٹی کم و ود 900ارب روپئی نا زرتس پوسکن آ پلانٹ آتون ودسا 1400ارب روپئی سالانہ مریک۔ اوپارے کہ گرج آن زیات بجلی پیدوار نا تدوک آ پنچ سال اٹی معاہدہ غاتا سوب آن داوخت آ باسنی نا خواست 25000میگاواٹ نا بدلہ 35000نا پیدواری لائخی ءِ ہراکہ ودکی ءِ و ہرافتا کیپیسٹی چارجز حکومت ءِ تروئی تمک مارکیٹ نا لیبر لائزیشن مفننگ نا سوب آن مچ آ بھاریم حکومت آ تمنگ ءِ۔ اوپارے کہ یخ آتیٹی بجلی نا خواست کم و ود 10000میگاواٹ اسکان کاہک کیپیسٹی نا مد اٹی مچ آ سال پیمنٹ کروئی تمک۔ پاورپلانٹ آتا بجلی ءِ کاریم اٹ اتپننگ نا بھلا سوب اوفتا فی یونٹ پیدواری خڑچءِ وخت اس کہ اڑزآن یونٹ دوئی مرے تو کبین انگا تیل و ایلو فیول آ چلینگوک آ پلانٹ آتے چلیفنگ مفک۔
