گورنر بلوچستان امان اللہ خان یاسین زئی نا سردار بہادر خان وویمن یونیورسٹی نا دورہ ءِ کننگ نا وخت آ گپ وتران

کوئٹہ۔ 01اپریل (اے پی پی) گورنر بلوچستان امان اللہ خان یاسین زئی پارینے کہ سرکاری ادارہ غاتا باقاعدہ دورہ ءِ کننگ آن ہی اونا کارکڑد، عملہ نا حاضری و سفائی نا حالیت آتے جوان وڑاٹ ہُننگ مریک۔ داخیال آتا درشانی ءِ او پنچ شنبے نادے آ سردار بہادر خان وویمن یونیورسٹی نا دورہ ءِ کننگ نا وخت آ گپ وتران کرسا کرے۔ گورنر بلوچستان وویمن یونیورسٹی ٹی سنٹرل لائبریری نا ہم بناءِ کرے و یونیورسٹی آڈیٹوریم، اسکول، ڈے کیئر سینٹر و زیر تعمیر ہاسٹل آتا ہم دورہ ءِ کرے۔ گورنر بلوچستان امان اللہ خان یاسین زئی پارے کہ دُن تو وویمن یونیورسٹی نا امور و باندات و کارکڑد اٹی خاصی گچینی بسنے ولے کارکڑد ءِ پین گچین کننگ کن گام گیج کننگے۔ مطالعہ و پٹ وپول آن ذوق تخوک آ آرٹیفیشل انٹیلی جنس و بائیو ٹیکنالوجی نا پوسکن آ کتاب آتیان ضرور راہشونی دوئی کیر۔ اوپارے کہ سردار بہادر خان وویمن یونیورسٹی ءِ ملک انا گچین انگا یونیورسٹی تا صف اٹ اتنگ کن داسہ بھاز گڑاکننگ سلوک ءِ۔ استاد آتا تعیناتی و پروموشن اٹ میرٹ نا خاص خیال ءِ تخنگے۔ اومستی پارے کہ کچ اٹنگا وسیلہ غاتیان پد ہم تعلیمی آب ءِ بڑز کننگ و تعلیمی چاگڑد ءِ مون آ دننگ نا بابت وائس چانسلر و اونا ٹیم انا جوزہ ستاکڑزک۔