وزیر خارجہ مخدوم شاہ محمود قریشی نا تاجکستان نا صدر امام علی رحمانوف تون اوڑدہی، ہڑتوم آ کنڈآتا تعلقداری تے پین سوگو کننگ نا عزم انا درشان

دوشنبے۔ 31مارچ (اے پی پی) وزیر خارجہ مخدوم شاہ محمود قریشی چارشنبے نادے آ تاجکستان نا دارالحکومت دوشنبے ٹی تاجکستان نا صدر امام علی رحمانوف تون صدارتی ماڑی ٹی اوڑدہی کرے۔ تاجکستان نا صدر امام علی رحمانوف پاکستان تون ہڑتوم آ کنڈآتا تعلقداری تے پین سوگو کننگ نا عزم انا درشانی ءِ کرے۔ وزیر خارجہ تاجک صدر امام علی رحمان ءِ اکتوبر 2020ء ٹی اڈ ہلوک آ گچین کاری تیٹی دُوارہ صدر گچین مننگ آ مبارکبادی تس و دوشنبے ٹی اڈ ہلوک، نہہ می ہارٹ آف ایشیا استنبول پراسس کانفرنس نا گچین بست وبند آتا ستاءِ کرسا، تاجک صدر ءِ مبارکباد پیش کرے و اونا پرخلوص مہمانداری آ اونا منت واری ءِ ہرفے۔ وزیر خارجہ پارے کہ پاکستان و تاجکستان نا نیام اٹ تاریخی برادرانہ تعلقداری ءِ ہرا اسہ وڑ مذہبی، تہذیبی و دودوربیدگی بنداو تیا استوار ءِ۔ شاہ محمود قریشی پارے کہ ستاکڑزوک ہیت دادے کہ ہڑتوم آ ملک آتا بڑزکو سرکڑدہ، ہڑتوم آ کنڈآتا مراسم ءِ پین ودفنگ و سوگو کننگ کن سنبرینگوک ءُ۔ پاکستان و تاجکستان نا نیام اٹ ہڑتوم آ کنڈآتا واپاری تعلقداری تے ودفنگ و کثیر الجہتی بشخ آتے ٹی ہڑتوم آ کنڈآتا کمکاری ءِ مون آ دننگ نا بابت بھلو وارخواہی اس ساڑی ءِ۔ شاہ محمود قریشی پارے کہ کاسا 1000کون آ اہم ڈٹ آتا وخت آ پوروی، سویلی و نیامی ایشیانا نیام اٹ توانائی راہداری نا جوڑ کننگ اٹ کمکار مریک۔ پاکستان و تاجکستان نا نیام اٹ ہڑتوم آ کنڈآتا واپاریکمکاری ءِ مون آ دننگ کن اسیجائی وزارتی کمیشن و اسیجائی ورکنگ پڑک کون آ ”ادارہ جاتی فریم ورکس، ءِ کاریم اٹ اتنگ نا گرج ءِ۔ اوڑدہی ٹی اوغان امن عمل تون اوار ڈیہہ ٹی امن و ایمنی نا حالیت آتا بابت ہم گپ وتران مس۔ وزیر خارجہ تاجک صدر ءِ اوغانستان اٹی امن کن پاکستان نا خیرخواہی کوشست و اوفتا بھرم تیان معلومدار کرے و پارے کہ پاکستان، ڈیہہ نا شونداری و شونہالی کن اوغانستان اٹی دیرپاامن ءِ المی تکک۔ پاکستان، اوغانستان تون اوار ڈیہہ ٹی امن کن تینا مخلصانہ کوشست آتے برجاتخک۔ تاجکستان نا صدر امام علی رحمان پاکستان تون ہڑتوم آ کنڈآتا تعلقداری تا وڑآ است جمی نا درشانی ءِ کرسا اودے پین سوگو کننگ نا عزم انا درشانی ءِ کرے۔