پاکستان و تاجکستان نا واپاری تعلقداری تا مون آ دننگ کن جوائنٹ ورکنگ گروپس و بین الحکومتی کمیشن فورم تے پین فعال کننگ نا فیصلہ

دوشنبے۔ 31مارچ (اے پی پی) پاکستان و تاجکستان واپاری تعلقداری تا مون آ دننگ کن جوائنٹ ورکنگ گروپس و بین الحکومتی کمیشن فورم تے پین فعال کننگ نا فیصلہ ءِ کرینو۔ کاسا 1000توانائیڈٹ آتا پوروی کن پاکستان نا عزم ستاکڑزنگ نا قابل ءِ۔ ڈٹ آن ہڑتوم آ ملک آتا نیام اٹ تعلقداری تے پین سوگو کننگ اٹ کمک رسینگک۔ چارشنبے نادے آ ڈل آتا کہول آ مذاکرات آن پد وزیر خارجہ شاہ محمود قریشی نا اسیجائی پریس کانفرنس آن تران کرسا تاجکستان نا وزیر خارجہ ڈل آتا کہول آ بامعنی مذاکرات آ پاکستان نا وزیر خارجہ مخدوم شاہ محمود قریشی نا منت واری ءِ ہرفے و پارے کہ مذاکرات اٹ پاکستان و تاجکستان نا نیام اٹ ہڑتوم آ کنڈآتا تعلقداری و اہم جہانی و علاقائی امور آ گپ وتران مس۔ ہڑتوم آ ملک آتا نیام اٹ تین پہ تینی کمکاری ٹی وخت اتون ودکی مننگ ءِ۔ داکان بیدس تاجکستان و پاکستان نا نیام اٹ اقتصادی کمکاری، ہوائی رابطہ، سیکورٹی کمک، انفراسٹرکچر، ٹیکنالوجی کمکاری و تعلیم نا بشخ آتیٹی ہڑتوم آ کنڈآتا کمکاری نا مون آ دننگ نا بابت ہم گپ وتران مس۔ فریق آک ہڑتوم آ ملک آتا نیام اٹ واپاری تعلقداری تے ودفنگ کن ہڑتوم آ کنڈآتا واپاری کچ اٹی ودکی نا گرج آ زور شاغار۔ تاجک وزیر خارجہ پارے کہ کاسا 1000توانائی ڈٹ انا پوروی کن پاکستان نا عزم ستاکڑزک دا ڈٹ انا پوروی آن ہڑتوم آ ملک آتا نیام اٹ تعلقداری تے پین سوگو کننگ اٹ کمک رسینگک۔ مخدوم شاہ محمود قریشی پارے کہ تدوک آ 30سال آن ننا تاجکستان تون ہڑتوم آ کنڈآتا تعلقداری وخت اتون اوار اوار سوگو مسنے۔ نن تاجکستان تون ہڑتوم آ کنڈآتا تعلقداری تیٹی ودکی انا دا رجحان نا تسلسل خوانہ۔ نن تاجک صدر و وزیر خارجہ نا زوت پاکستان آ بننگ نا خواہندار اُن۔ شاہ محمود قریشی پارے کہ پاکستان و تاجکستان نا نیام اٹ کمکاری ءِ مون آ دننگ نا بابت اِرا اسیجائی ڈیکلریشن 2017و 2018ء ٹی طے مسنے۔ پاکستان و تاجکستان نا نیام اٹ ہڑتوم آ کنڈآتا کمکاری نا بابت روڈ میپ مست آن ساڑی ءِ۔ شاہ محمود قریشی پارے کہ نن فیصلہ کرینن کہ نن پاکستان و تاجکستان نا نیام اٹ واپاری تعلقداری تا مون آ دننگ کن جوائنٹ ورکنگ گروپس و بین الحکومتی کمیشن کون آ ساڑی فورم تے پین فعال کینہ۔ نن اینو پاکستان و تاجکستان نا نیام اٹ واپاری و اقتصادی کمکاری ءِ مون آ دننگ نا بابت سرجم گپ وتران کرین۔ شاہ محمود قریشی ہڑتوم آ ملک آتا گچین کاروباری بندغ آتیا زور شاغاکہ او اسہ ایلو تون رابطہ غاتے ودفر، ننے تاجکستان نا ڈل انا مہمانداری ءِ کرسا خوشی مریک۔ نن تاجک زرکارآتے پاکستان اٹ زرکاری کن ہروڑنا آسراتی فراوان کننگ کن تیار اُن۔ پاکستان و تاجکستان ہڑتوم آک دہشت گردی نا عفریت نا برخلاف جنگ تسر مخدوم شاہ محمود قریشی پارے کہ اقوام متحدہ تون اوار جہانی فورم تیا پاکستان و تاجکستان نا نیام اٹ کمکاری ستاکڑزک و نن دادے پین گچین کننگ کن سنبرینگوک اُن۔ ننا ہڑتوم آ کنڈآتا دفاعی کمک است جم ءِ، ننے تاجکستان نا عسکری لائخی تے گچین کننگ اٹ کمکاری نا فراوانی آ خوشی مریک۔ مخدوم شاہ محمود قریشی پارے کہ کنے داسماتما خوشی مس کہ 200نا خڑک تاجک آفیسر پاکستان آن دفاعی ٹریننگ ہلکونو، نن پین تاجک آفیسر آتے عسکری و سفارت کاری نا تربیت کن بخیر اٹ پانہ۔ شاہ محمود قریشی پارے کہ ای تاجک وزیر خارجہ ءِ باور کرفینوٹ کہ نن توانائی نا اہم ڈٹ کاسا 1000نا زوت پوروی کن غٹ کوشست آتے کاریم اٹ اتینہ۔ کاسا 1000نئے بیرہ ہڑتوم آ ملک آتیکن فائدہ نا سوب ءِ بلکن مچ آ ڈیہہ داڑآن فائدہ ہرفنگ کیک۔ شاہ محمود قریشی پارے کہ کنے تاجک وزیر خارجہ نا کمک اٹ داسما تما خوشی مس تاجک صدر اوغان صدر تون اوڑدہی ٹی سہ فریقی ٹرانزٹ ٹریڈ معاہدہ نا گرج آ زور شاغا۔ نن اوغان سرکڑدہ غاتون ہم دامعاملہ ءِ ہرفنہ انتئے کہ دا پاکستان، تاجکستان و اوغانستان، ہرمسٹ آ ملک آتیکن فائدہ ئی مننگ کیک۔ کنے تاجکستان تون ہڑتوم آ کنڈآتا تعلقداری نا وڑآ است جمی ءِ۔ انشاء اللہ ای جولائی ٹی شنگھائی کمکار تنظیم نا وزرائے خارجہ میٹنگ نا تیاری دیوان اٹی دُوارہ تاجکستان آ بریوہ۔