حافظ طاہر محمود اشرفی نا پریس کانفرنس آن تران

اسلام آباد۔ 31مارچ (اے پی پی) وزیراعظم نا نمائندہ خصوصی مذہبی ہم آہنگی و دے ٹک نیامی و پاکستان علماء کونسل نا چیئرمین حافظ محمد طاہر محمود اشرفی پارینے کہ ایس او پی تا رداٹ مسیت آک ملوک مریرہ، روچہ مبارک اٹ ترابیح ہم مریک، عالم دینک فتویٰ تسنو کہ کورونا ویکسین خلفنگے، ہرااسہ انسان اسے بچفے اومچ آ انسانیت ءِ بچفے، پاکستان نا عرب دنیا تون تعلقداری گچین مسنے، کویت ناویزہ غاتا چرجوئی بنا مننگ والا ءِ، پاکستان عرب دنیا کن ملوک ءِ و عرب دنیا پاکستان کن، ہراتم اسکان کشمیر نا ویل ایسر مفک ڈیہہ ٹی امن مننگ کپک۔ داخیال آتا درشانی ءِ او چارشنبے نادے آ داڑے پریس کانفرنس آن تران کرسا کرے۔ حافظ محمد طاہر محمود اشرفی پارے کہ حکومت مسیت آتے بند کپننگ ءِ، مسیت آتیان اللہ اکبر نا توار بڑز مریک، کورونا دین اٹی غٹ آن زیات مسیت آتیٹی ایس او پی تیا عمل کننگا، ای پیدوار کننگ اٹی اُٹ کہ مسیت آک ملوک مریرہ، روچہ مبارک اٹی ترابیح و نماز ہم مریک ولے رکھی گام گیج اختیار کننگک۔ اوپارے کہ نن تدوک آ سال ہم روچہ مبارک اٹی مسیت آتے یلہ ہلان، تدوک آ سال ہم مسیت آتیٹی ترابیح و عئید انا نماز مس، داسال ہم مسیت آتے یلہ مریرہ و نماز ترابیح ہم مریک۔ اوپارے کہ تدوک آ پنچ تُو اٹی عرب دنیا تون تعلقداری ٹی بھاز گچینی بسنے۔ سعودی عرب نا ولی عہد امیر محمد بن سلمان وزیراعظم عمران خان ءِ فون کرسا دورہ سعودی عرب نا سلہ خلک ہرادے او قبول کرینے و زیراعظم آخبت خڑک اٹ سعودی عرب نا دورہ ءِ کیک۔ حافظ طاہر محمود اشرفی پارے کہ کویت و مصر اتون ننا تعلقداری گچینی مسنے، عراق نا وزیر دفاع پاکستان آبس، ننا سرکڑدہ غاک ہمونگیا ہِننگ ءُ۔ اوپارے کہ پاکستان ڈے پریڈ نا وخت آ عراق، فلسطین، سعودی عرب، ترکی و بحرین نا سرکڑدہ غاک و سعودی عرب نا بری فوج انا سروک ئسک ہم ساڑی ئسر۔ نن امت مسلمہ نا وحدت و سیوت ءِ خوانہ، پریڈ نا وخت آ فلسطین نا بیرک ءِ چست کننگ پاکستان نا فلسطین نا بارواٹ پالیسی نا درشانی ءِ۔ اوپارے کہ صدر مملکت پریڈ نا وخت آ کشمیر نا بابت ہیت کرے کہ ہندوستان آن امن نا غٹ کسرک کشمیر نا کمک اٹ کارہ۔ اوپارے کہ ہراتم اسکان کشمیر نا ویل ایسر مفک ہمووخت اسکان ڈیہہ ٹی امن مننگ کپک۔ اوپارے کہ سعودی عرب نا ولی عہد نا کنڈآن دے ٹک نیامی و سعودی عرب اٹ درخت خلنگ نا پڑو کننگا۔ نن دا چرجوئی ٹی تینا آزموندہ نا رداٹ سعودی عرب تون کمک کینہ۔ اوپارے کہ پاکستان و سعودی عرب نا ڈٹ دنیا کن چاگڑدی بدلی نا بابت ٹیکی اسے۔