چناتیٹی کورونا دین ترندی اٹ تالان مننگ ءِ، نوشین حامد

اسلام آباد۔ 31مارچ (اے پی پی) پارلیمانی سیکرٹری قومی جان جوڑی ڈاکٹر نوشین حامد پارینے کہ چناتے ٹی کورونا دین ترندی اٹ تالان مننگ ءِ، ملک اٹی کورونا دین انا مسٹ میکو ریسہ بھاز سنگین ءِ۔ چارشنبے نادے آ تینا بیان اٹی اولمہ و باوہ غاتے پارے کہ او تینا چناتے ٹی پڈانا خل، متلی و اسہال نا علامت ظاہر مننگ آ معالج تون رابطہ کیر تانکہ اوفتے قوت مدافعت اٹ کمتی آن بچفنگ مرے۔ اوپارے کہ چناتے ٹی کوویڈ۔ 19نا علامت کم پاش مریک ولے بیرہ رکھی گام گیج اختیار کرسا چناتے ٹی دا ناجوڑی ءِ توننگ مریک۔ اوشاری تے کورونا ایس او پی تیا سختی اٹ عمل کننگ نا پارت کرسا پارے کہ مچی تیا ہِننگ آن پاناد، ماسک انا کاریم اٹ اتنگ و راجی فاصلہ ءِ برقرار تخنگے۔ اوپارے کہ کوویڈ۔ 19 ویکسین خلفنگ کن وزارت جان جوڑی نا ویب سائٹ و 1166نمبر نا کمک اٹ درج کرفر۔ اومستی پارے کہ ملک انا بزرگ شاری تیکن ویکسی نیشن نا عمل برجاءِ۔ اوپارے کہ جہانی برادری کوویڈ۔ 19نا برخلاف جنگ اٹ پاکستان نا کوشست آتا معترف ءِ۔ حکومت فارماسیوٹیکل کمپنی تے کوویڈ۔ 19آن بچفنگ نا ویکسین ہلنگ نا موکل تسنے۔