پاکستان و تاجکستان نا وزیر خارجہ غاتا نیام اٹ ڈل آتا کہول آ مذاکرات

دوشنبے۔ 31مارچ (اے پی پی) پاکستان و تاجکستان نا وزیر خارجہ غاتا نیام اٹ ڈل آتا کہول آ مذاکرات مس، ہڑتوم آ وزیر خارجہ غاک ہڑتوم آ کنڈآتا تعلقداری تے ودفنگ و چندی بشخ آتے ٹی ہڑتوم آ کنڈآتا کمکاری ءِ مون آ دننگ کن اسیجائی کوشست آتے کاریم اٹ اتنگ آ امنا کریر۔ داکان مست چارشنبے نادے آ وزارت خارجہ غا بننگ آ تاجکستان نا وزیر خارجہ سراج الدین مہرالدین شاہ محمود قریشی و اونا ڈل ءِ بخیر کرے۔ سیکرٹری خارجہ سہیل محمود و تاجکستان اٹی پاکستان نا سفیر عمران حیدر و پاکستانی سفارت خانہ نا سینئر کمامدار آک وزیر خارجہ تون اوار ئسر۔ وزارت خارجہ تاجکستان اٹ پاکستان و تاجکستان نا نیام اٹ ڈل آتا کہول آ مذاکرات مس۔ پاکستانی ڈل انا کماشی ءِ وزیر خارجہ مخدوم شاہ محمود قریشی وخت اس کہ تاجک ڈل انا کماشی ءِ تاجک وزیر خارجہ مہرالدین سراج الدین کرے۔ مذاکرات اٹی ہڑتوم آ کنڈآتا تعلقداری، چندی بشخ آتیٹی ہڑتوم آ کنڈآتا کمکاری ءِ مون آ دننگ تون اوار تین پہ تینی است خواہی نا چندی باندات آ گپ وتران کننگا۔ شاہ محمود قریشی پارے کہ پاکستان و تاجکستان نا نیام اٹ برادرانہ تعلقداری ءِ۔ پاکستان و تاجکستان نا نیام اٹ ہڑتوم آ کنڈآتا تعلقداری، اسہ وڑ مذہبی، دودوربیدگی و تہذیبی قدر انا بنداو آ استوار ءِ۔ ہڑتوم آ وزیر خارجہ غاک ہڑتوم آ کنڈآتا تعلقداری نا وڑآ است جمی نا درشانی ءِ کرسا اودے پین سوگو کننگ ناعزم انا درشانی ءِ کریر۔ وزیر خارجہ پارے کہ پاکستان و تاجکستان نا نیام اٹ ہڑتوم آ کنڈآتا واپار نا مون آ دننگ نا بابت بھاز انگا وارخواہی دوئی ءِ ہرافتیان فائدہ ہرفنگ نا گرج ءِ۔ پاکستان،تاجکستان ءِ گوادر پورٹ انا دروشم اٹ، سویل دے ٹکی ایشیاء، دے ٹک نیامی، و افریقہ اسکان رسینگ نا گونڈ ءُ کسر اس فراوان کیک، دا بندرگاک پاکستان و تاجکستان، نا نیام اٹ ہڑتوم آ کنڈآتا واپاری کچ اٹی ودکی کن کمکار مننگ کیرہ۔ ہڑتوم آ وزیر خارجہ غاک پاکستان و تاجکستان نا نیام اٹ، اسیجائی وزارتی کمیشن و اسیجائی ورکنگ گروپس کون آ ”ادارہ جاتی میکانزم“ ءِ پین سوگو و فعال کننگ نا گرج آ زور شاغار۔ وزیر خارجہ اومیت ظاہر کرے کہ پاکستان و تاجکستان نانیام اٹ مروک آ پنچ می ہڑتوم آ کنڈآتا سیاسی سلابتی دیوان نا اڈتننگ آن، ہڑتوم آ ملک آتا نیام اٹ چندی بشخ آتیٹی کمکاری ءِ مون آ دننگ نا کسر آوار مریک۔ ہڑتوم آ وزیرخارجہ غاک ہڑتوم آ کنڈآتا تعلقداری تے ودفنگ و چندی بشخ آتیٹی ہڑتوم آ کنڈآتا کمکاری نا مون آ دننگ کن اسیجائی کوشست آتے کاریم اٹ اتنگ آ امنا کریر۔