بنجائی وزیر داخلہ شیخ رشید احمد نا سیف سٹی اسلام آباد نا دورہ

اسلام آباد۔ 30مارچ (اے پی پی) بنجائی وزیر داخلہ شیخ رشید احمد سے شنبے نادے آ سیف سٹی اسلام آباد نا دورہ ءِ کرے۔ سیف سٹی آ سرمننگ آ بنجائی وزیر داخلہ ءِ گارڈ آف آنر تننگا۔ وزیر داخلہ شیخ رشید احمد ءِ سیف سٹی کیمرہ غاتیا سرجم حوال تننگا۔ آئی جی اسلام آباد وزیر داخلہ ءِ امن و ایمنی نا بابت بریف کرے۔ وزیر داخلہ ءِ اسلام آباد نا چندی علاقہ غاتیٹی خلوک کیمرہ غاتیا ہم حوال تننگا۔ داوخت آ بنجائی وزیر داخلکہ اسلام آباد اٹی کروک آ گام گیج آتا ستاءِ کرے و پارے کہ داڑے پین کیمرہ خلنگ وخت انا گرج ءِ۔ امن و ایمنی ءِ پک کننگ ننا غٹ انا زمواری ءِ۔ داوخت آ میڈیا تون گپ وتران کرسا بنجائی وزیر داخلہ پارے کہ اسلام آباد اٹی ہندا تُو بھاز کاریم کننگ والااُن۔ اوپارے کہ پولیس ہم فرنٹ لائن آ تینا زمواری تے پورو کننگ ءِ، این سی او سی تون ہیت کینہ کہ پولیس لائن ءِ ہم کورونا ویکسینیشننا آسراتی تننگے، سیف سٹی اتھارٹی کانود تون مریک۔ اوپارے کہ اسلام آباد بھاز تالان مسنے۔ 240ٹورسٹ پولیس لانچ کننگ والا ءُ، پولیس نا ودکی نفری نا سمری وزیراعظم عمران خان ءِ گدریفینہ۔ اوپارے کہ میڈیا سٹی و صحافی تے اُرائی ہنکین نا زوت پڑو کننگک اوکان پد ولدا دا پریس کلب نا کاریم مریک، اُرائی ہنکینی آسراتی ہموصحافی تے ایتنہ ہرافتے تون داڑے ہنکینی آسراتی اف۔ اوپارے کہ 11,22نا 25گاڈی ہلینہ۔ اسلام آباد نا پولیس بے مٹ ءُ پولیس اسے دادے پین گچین کننگ اُن۔ اوپارے کہ 8 ڈرون ہلنگ اُن۔ اسہ سوج اسے نا ورندی ٹی اوپارے کہ اسلام آباد پولیس نا تنخواہ و الاؤنس ءِ ہم بایدے ودفنگے۔ اوپارے کہ وزیراعلیٰ پنجاب عثمان بزدار نا برخلاف ہچ ءُ بے پتی اس بفک، وزیراعظم تون تفوک اُن۔ اسہ سوج اسے نا ورندی ٹی بنجائی وزیر پارے کہ پی ڈی ایم مہالو آن تہہ آن پورو ئس، شار اکن 18سد کیمرہ مہالو آن خلوک ءُ 12سد پین کیمرہ ہلنگ اُن۔ اسہ سوج اسے نا ورندی ٹی بنجائی وزیر پارے کہ کنا دا 15می وزارت ءِ، وزیراعظم تون بسوسٹ، اوڑتون سلوک اُٹ و وزیراعظم پنچ سال ءِ پورو کیک۔