اسلام آباد۔ 30 مارچ (اے پی پی) پاکستان تحریک انصاف نا باسک قومی اسمبلی فرخ حبیب پارینے کہ فارن فنڈنگ کیس آن تحریک انصاف سرسہب مرسا پیش تمک، سکروٹنی کمیٹی نا کاریم اٹ تاخیر نا زموار اکبر ایس بابر ءِ،، اودے ہر پیشی آ مریم نواز نا کنڈآن ایزی لوڈ ملک، اونا پوفانک آن ہوا پیش تمانے۔ سے شنبے نادے آ الیکشن کمیشن نا پیشن میڈیا تون گپ وتران کرسا پارے کہ اکبر ایس بابر نا بابت پاننگاکہ اوکارروائی ٹی اڑنگ شاغک، اکبر ایس بابر پائے کیس ءِ انت اکن مرغن کننگ ءِ، اودے ہر پیشی ایزی لوڈ ملک۔ اوپارے کہ مسلم لیگ ن اسامہ بن لادن آن دہ ملین ڈالر ہلک، پی ٹی آئی ٹھیکہ و کک بیکس آن فنڈ ہلتنے، سکروٹنی کمیٹی مسہ جماعت آتا فنڈآتا جاست وپاست کننگ ءِ، ن لیگ و پیپلزپارٹی تینا فنڈنگ نا ذریعہ ءِ پاپننگ ءِ، پی ٹی آئی اسٹ انگا جماعت ءِ ہرا تینا 40 ہزار ڈونرآتا ریکارڈ سکروٹنی کمیٹی ءِ فراوان کرے، ہربندغ پی ٹی آئی نا سرسہبی ٹی تینا بشخ ءِ شاغے۔ دا کیس چٹا تو اکبر ایس بابر ءِ مریم نواز نا کنڈآن ایزی لوڈ ملنگ بند مریک۔ اودے ہر پیشی آ ایزی لوڈ ملک۔ ن لیگ انا پاننگ آ کیس اتون مون تروک اکبر ایس بابر نا پوفانک آن ہوا پیش تمانے۔ اوحماد اظہر ءِ وزیر خزانہ جوڑ کننگ نا بارواٹ سوج انا ورندی ٹی پارے کہ وزیراعظم حکومت نا دونیم سال انا کارکڑد نا جاچ ءِ ہلک۔ او زرگزرانی گچینی کن پوسکن ءُ ٹیم اس اتسا بننگ ءِ، کیپٹن ءِ فیصلہ کروئی ءِ کہ ہراگوازی گر ءِ ہراڑے گوازی کروئی ءِ۔ حماد اظہر گچین مروک ءُ نمائندہ سے اونا کارکڑد بھاز جوان ءِ۔ اوپارے کہ یکم اپریل کن پیپلزپارٹی و مسلم لیگ ن ءِ ہم نوٹس جاری کننگانے، مریم نواز الیکشن کمیشن اٹ تینا رسید آتون اوار پیش مرے۔ اگہ نی پیش مفیسہ تو قوم سمجھک کہ نے تون رسید اف۔ اوپارے کہ نی ریکارڈ ءِ پیش کپیسہ چارسال آن نروک اُس۔ تحریک انصاف تون غٹ ریکارڈ ساڑی ءِ، مسلم لیگ ن کروڑ آ روپئی گدریفنگ نا ذریعہ غاتے پاپننگ ءِ، تحریک انصاف ٹھیکہ غاتیان کمیشن آن فنڈ ہلتنے۔ اوپارے کہ اوورسیز پاکستانی ملک انا خذمت ءِ کننگ ءُ۔
