وزیر خارجہ مخدوم شاہ محمود قریشی نا دوشنبے ٹی اڈ ہلوک آ ”نہہ می“ ہارٹ آف ایشیا۔ استنبول پراسس“ کانفرنس نا وخت آ اوغانستان نا صدر اشرف غنی تون اوڑدہی

دوشنبے۔ 30مارچ (اے پی پی) وزیر خارجہ مخدوم شاہ محمود قریشی سے شنبے نادے آ تاجکستان نا دارالحکومت دوشنبے ٹی اڈ ہلوک آ نہہ می”ہارٹ آف ایشیا۔ استنبول پراسس“ کانفرنس نا وخت آ اوغانستان نا صدر اشرف غنی تون اوڑدہی کرے۔ اوڑدہی ٹی پاک، اوغان ہڑتوم آ کنڈآتا تعلقداری، اوغان امن عمل تون اوار تین پہ تینی است خواہی نا چندی باندات آ گپ وتران کننگا۔ وزیر خارجہ پارے کہ ڈیہہ، خاص وڑاٹ اوغانستان اٹی امن کن کروک آ کوشست آتیٹی ”ہارٹ آف ایشیااستنبول پراسس، نا وزارتی دیوان نا اڈتننگ، اسہ گچین و جوان ءُ گام اسے۔ شاہ محمود قریشی پارے کہ پرامن و سوگو اوغانستان، پاکستان نا فائدہ ٹی ءِ۔ پاکستان، ڈیہہ ٹی امن کن کروک آ کوشست آتیٹی شریدار ءِ۔ پاکستان، ڈیہہ نا امن و سوگوی کن اوغانستان اٹی امن ءِ المی تکک۔ شاہ محمود قریشی پارے کہ ننے اوغانستان اٹی تشدد نا ودوک آ واقعہ غاتیا گڑتی ءِ، پاکستان نا مدام موقف مسنے کہ اوغان ویل ءِ طاقت نا کمک اٹ ایسر کننگ مفک۔ شاہ محمود قریشی پارے کہ پاکستان، جامع مذاکرات نا کمک اٹ، اوغان ویل انا سیاسی ایسری نا مخ تف ءِ، بین الاوغان مذاکرات نا نتیجہ ٹی مثبت پیش رفت، اوغان امن عمل ءِ ایسر اسکان سرکننگ اٹ کمکار جوڑ کننگ کیک۔ شاہ محمود قریشی پارے کہ پاکستان، اوغان امن عمل تون اوار، ڈیہہ ٹی امن کن تینا مخلصانہ کوشست آتے برجاتخنگ کن سنبرینگوک ءِ۔ اوغان صدر اشرف غنی وزیراعظم عمران خان نا زوت دراخ جوڑی کن نیک است خواہی تا درشانی ءِ کرے۔