اسلام آباد۔29مارچ (اے پی پی):پاکستان ءُ سعودی عرب ءَ درائیں پڑآں دونیمگی کمک ءَ را گیش کنگ ءُ یکجاہ کار کنگ ءِ سرءَ تپاک ءُ دونیمگی سیادی ءَ را گیش محکم کنگ ءِ جزم ءِ درشانی کتگ۔ مزن وزیر میڈیا کارگس ءَ چہ جاری بیان ءِ ردءَ دوشمبے ءِ روچءَ مزن وزیر عمران خان ءَ را سعودی ولی عہد، نائب مزن وزیر ءُ دیمپانی ءِ وزیر محمد بن سلمان ءَ ٹیلیفون کتگ۔ ولی عہد شہزادہ ءَ مزن وزیر ءِ جان ءُ سلامتی ءِ ہوالگ ءَ جُستءُ پُرس کتگ ءُ آئی ءِ زوت دُراہ بوہگ ءِ دعا کتگ۔ مزن وزیر عمران خان ءَ ولی عہد ءِ حیر ءُ حیریت جست کتگ کہ انو زوتاں آئی ءِ جراحی بوتگ۔ مزن وزیر عمران خان ءَ ولی عہد شہزادہ ءِ جار جتگیں” گرین سعودی گامگیج” ءُ گرین مشرق وسطی ءِ گامگیج” ءَ را ساڑاتگ۔ مزن وزیر عمران خان ءَ پہ شاہ سلمان بن عبدالعزیز ءَ نیکیں واہگانی درشانی کتگ۔ مزن وزیر ءُ علی عہد ءَ درائیں پڑآں دونیمگی سیادی ءَرا گیش دیمروئی دیئگ ءِ ھاترءَ یک جاہ کنگ ءِ سرءَ تپاک کتگ۔ سعودی ولی عہد ءَ مزن وزیر ءَ را زور سعودی عرب ءِ ترءُتاب کنگ ءِ دعوت داتگ۔ مزن وزیر ءَ اے دعوت قبول کتگ۔ دوئیں راہشوناں پاک سعودی عرب براتی ءَ محکم، دراج بُر ءُمحکم کنگ ءِجزم ءِ درشانی کتگ۔
