امریکہ مقبوضہ کشمیر اٹی مودی حکومت نا ریاستی مسلم اکثریتءِ غیر کانودی وڑاٹ چٹفنگ نا ڈٹ و کشمیری تا کشت و خون ءِ بند کرفنگ کن تینا کڑد ءِ ادا کے، سردار مسعود خان

اسلام آباد۔ 29 مارچ (اے پی پی) صدر آزاد کشمیر سردار مسعود خان امریکہ غان خواست کرینے کہ او متنازعہ ریاست جموں و کشمیر اٹی مودی حکومت نا کنڈآن ہندوآبادی نا بھلو کچ اسے آ گدریفنگ نا کمک اٹ ریاستی مسلم اکثریت ءِ غیر کانودی وڑاٹ چٹفنگ نا ڈٹ و مقبوضہ علاقہ ٹی کودک کشمیری تا کشت وخون ءِ بند کرفنگ کن تینا کڑد ءِ ادا کے۔ اواسہ قومی انگریزی جریدہ اسے انٹرویو ترسا پارے کہ او وخت بسنے کہ امریکہ تینا دا مفروضہ غا نظر شاغے کہ بھارت نا 9 لکھ فوج مقبوضہ کشمیر اٹی دہشت گردی اتون جنگ تننگ کن بسنے بھارت نا دا بیانیہ دروغ ءِ ہرانا راست اتون ہچ ءُ تعلق اس اف۔ اوپارے کہ امریکہ بھارت آن مقبوضہ جموں و کشمیر اٹ بدترین جارحیت، ظلم و تشدد بند کرفنگ و شاری و بنداوی آجوئی تا بحالی کن غیر مبہم و دوٹوک لوز آتیٹی خواست کے انتئے کہ امریکہ ہمو ملک ءِ ہرا کم و ود اسہ صدی آن انسان تا حق خودارادیت نا وکالت ءِ کرسا بسنے و نن داوڑنا ملک آن دا گمان تخپنہ کہ او کشمیری تا حق خودارادیت نا کسر اٹ اڑاند جوڑ مریک۔ اوپارے کہ کشمیریل جمہوری وڑاٹ آجو رائے شماری نا کمک اٹ تیناآخبت نا فیصلہ ءِ کننگ خوارہ و دااسہ انوکھا ءُ خواست اس اف بلکن کشمیری تا دا حق ءِ اقوام متحدہ نا سلامتی کونسل نا قرارداد آتا دروشم اٹ جہانی برادری مست آن امنا کرینے۔ جہانی برادری و جہانی میڈیا نا کنڈآن کشمیر آ اسہ وار اس ہم چکار تخنگ نا گمان تا بارواٹ ہریفوک آ اسہ سوج اسے نا ورندی ٹی صدر سردار مسعود خان پارے کہ داکان مست کہ دنیا جموں و کشمیر نا کنڈآ چکار کے پاکستان و آزاد کشمیر نا سیاسی جماعت آتے تینٹ تینا چکار ءِ کشمیر آ کروئی مریک انتئے کہ دنیا دا ہُننگ خواہک کہ نن داڑآن ہراگڑا نا خواست ءِ کننگ اُن اونا کنڈآن ننا خس چکار ءِ انتئے کہ دنیا نا چکار براہ راست ننا جوزہ و کوشست آتا تناسب اٹ مریک۔ اسہ پین سوج اسے نا ورندی ٹی صدر آزاد کشمیر پارے کہ کشمیر نا ویل انا بابت ننا تینا سرسہبی تے کم کرسا پیش کننگ نا ضرورت اف ننے داگیرام کپن کہ بھارت نا مقبوضہ جموں و کشمیر اٹی تازہ جارحیت آن پد دنیا ٹی اسہ ہڑدڑ اس برپامسوسس و کشمیر نا ویل ءِ دنیا نا بااثر پارلیمان و سول سوسائٹی ٹی بھلو کچ اسے آ شرہ ٹی اتنگاسس ولے دا حقیقت تینا جاگہ غا ٹی ءِ کہ ننے ہمو نتیجہ دوئی متو ہرادرکار ئس ہنداخاطرآن ننا مون آ پدریسہ جہد آن بیدس پین ہچ ءُ کسر اس اف۔