پنچ سال اسکان نا وئی نا 4 کروڑ چناتے پولیو ویکسین نا پڑی کنفنگ کن دوشنبے نادے آن پنچ دے ئی پولیو تور مہم بناکرینے، ڈاکٹر فیصل سلطان

اسلام آباد۔ 29 مارچ (اے پی پی) وزیراعظم نا خصوصی کمکار جان جوڑی ڈاکٹر فیصل سلطان پارینے کہ دوشنبے نادے آن پنچ سال اسکان نا وئی نا 4 کروڑ چناتے پولیو ویکسین نا پڑی کنفنگ کن پنچ دے ئی پولیو تور مہم نا بناءِ کننگانے۔ دوشنبے نادے آ تینا بیان اٹی اوپارے کہ پولیو تور مہم اٹی 2 لکھ 85 ہزار فرنٹ لائن ورکرز مچ آ ملک اٹی کورونا ایس او پی تیا عمل کرسا بشخ ہلنگ ءُ۔ اوپارے کہ کورونا دین انا مون ءِ توننگ ننکن بھاز بھلو چیلنج اسے ولے مشکل حالیت آتیان پد ہم جان جوڑی آسراتی نا فراوانی حکومت نا اولیت ءِ۔ حکومت چناتا قوت مدافعت اٹی ودکی کن پولیو تون اوار ایلوناجوڑی تا توننگ کن متاماری کننگ ءِ۔ اوپارے کہ تدوک آ سال لمہ و باوہ غاتا کمک اٹ و فرنٹ لائن ورکرآتا گچین کارکڑد نا سوب آن 6 سرسہب پولیو تور مہم آتا بناءِ کننگاسس۔ اوپارے کہ تدوک آ6 تُو اٹی مروک آ سرسہب پولیو تور مہم آتا نتیجہ غاتا رداٹ پولیو کیس آتیٹی بھلو حداسسکان کمتی مسنے۔ اوفرنٹ لائن ورکرآتا گچین کارکڑد نا ستاءِ کرسا دااومیت نا درشانی ءِ کرے کہ فرنٹ لائن ورکرآک داوار ہم گچین کارکڑد نا درشانی ءِ کرسا مہم اٹی تینا درکار ہدف ءِ دوئی کیرہ۔ اولمہ و باوہ غاتیان خواست کرے کہ او تینا پنچ سال اسکان وئی نا چناتے پولیو نا پڑی ضرور کنفر تانکہ اوفتے مچ آ زند انا معذوری آن بچفنگ مرے۔