وزیر خارجہ مخدوم شاہ محمود قریشی ڈل اتون اوار دوشنبے آ رادہ

اسلام آباد۔ 29 مارچ (اے پی پی) وزیر خارجہ مخدوم شاہ محمود قریشی دوشنبے نادے آ ڈل اتون اوار دوشنبے ٹی اڈ ہلوک آ نہہ می، ’ہارٹ آف ایشیا، استنبول پراسیس، (ایچ۔او۔اے، آئی۔پی) وزارتی کانفرنس اٹی بشخ ہلنگ کن مسہ دے ئی دورہ غا تاجکستان آ روانہ مسنے۔ وزیر خارجہ، دوشنبے ٹی اڈ ہلوک آ نہہ می”ہارٹ آف ایشیا، استنبول پراسیس“ کانفرنس اٹی پاکستانی ڈل انا کماشی ءِ کیک۔ دا نہہ می ہارٹ آف ایشیاکانفرنس نا سرحال ”امن و شونداری کن امنائی سلاہ ءِ سوگو کننگ“ ءِ۔ وزیر خارجہ مخدوم شاہ محمود قریشی دا وزارتی کانفرنس اٹی خصوصی تران کیک۔ وزیر خارجہ تینا تران اٹی اوغان عمل اٹ پاکستان نا مثبت کوشست و علاقائی فریم ورک انا تہہ ٹی اوغانستان نا شونداری و رابطہ غاتیکن مخ تفی ءِ تالان کیک۔ تاجکستان نا دورہ ٹی وزیر خارجہ، چندی ملک آتا وزیر خارجہ، خاص وڑاٹ تاجک ہم منصب و ایلو تاجک سرکڑدہ غاتون ہڑتوم آ کنڈآتا اوڑدہی کیک ہرافتے ٹی ہڑتوم آ کنڈآتا تعلقداری، چندی بشخ آتیٹی ہڑتوم آ کنڈآتا کمکاری ءِ مون آ دننگ، علاقائی سلامتی تون اوار تین پہ تینی است خواہی نا اہم باندات آ گپ وتران کیک۔ ’ہارٹ آف ایشیائی، استنبول پراسیس، 2011ء ٹی بناکننگاسس۔ داعلاقائی کمکاری، پت سازی نا گام گیج(سی۔بی۔ایمز) و ہیت وگپ انا کمک اٹ اوغانستان اٹی امن، سوگوی و شونہالی نا مون آ دننگ نا اسہ اہم پلیٹ فارم اس تکنگک۔ گمان ءِ کہ وزیر خارجہ نا دا دورہ تاجکستان، ہڑتوم آ ملک آتا نیام اٹ تاریخی، دودوربیدگی و تمدنی قدر انا بنداو آ استوار ہڑتوم آ کنڈآتا تعلقداری تے پین سوگو کننگ و ڈیہہ ٹی امن کن کوشست آتا مون آ دننگ نا بابت کمکار مریک۔