حکومتی وزیر آتا اسپیکر قومی اسمبلی اسد قیصر تون اوڑدہی

اسلام آباد۔ 29 مارچ (اے پی پی) حکومتی وزیر آک اسپیکر قومی اسمبلی اسد قیصر تون اوڑدہی کریر۔ قومی اسمبلی سیکرٹریٹ نا رداٹ اوڑدہی ٹی سید فخر امام، فواد چوہدری و ڈاکٹر بابراعوان ئسک ساڑی ئسر۔ اوڑدہی ٹی قومی اسمبلی نا دیوان نا بابت گپ وتران کننگا۔ کورونا ٹی قومی اسمبلی نا دیوان اٹی رکھی گام گیج آتا جاچ ءِ ہلنگا۔ قومی اسمبلی نا دیوان ءِ بامعنی جوڑ کننگ کن حکمت عملی آ ہم سجفنگا۔ ایوان نا چاگڑد ءِ سازگار کننگ کن حکومتی وزیر آک اسپیکر ءِ باوری کرفیر۔ قومی اسمبلی دیوان کانودی و گچین کاری اصلاحات آ چکارءِ تخنگک۔ گچینکاری اصلاحات کن حکومت اپوزیشن ءِ ہروڑنا فورم اس مہیا کننگ کن تیار ءِ۔ داوخت آ اسپیکر قومی اسمبلی پارے کہ گچین کاری اصلاحات کن پارلیمانی کمیٹی اس جوڑ کننگ انگ ءِ۔ اپوزیشن و حکومت گچین کاری اصلاحات کن تینا کڑد ءِ ادا کیر۔ اوپار ے کہ اصلاحات نا بابت غٹ جماعت آتون ہیت کیوہ۔ اپوزیشن و حکومت گچین کاری اصلاحات آ تینا سلاہ ایتر۔ اسد قیصر پارے کہ نن اواری اٹ گچین کاری اصلاحات آ بایدے ہیت کین تانکہ الس نا گچین کاری عمل آ پت بحال مننگ کے۔ اوڑدہی ٹی سید فخر امام پارلیمانی سفارتکاری نا کمک اٹ کشمیر نا ویل ءِ تالان کننگ آ اسپیکر نا کوشست آتا ستاءِ کرے و پارے کہ چارمیکو اسپیکر کانفرنس اٹ کشمیر آ پاکستان نا اصولی موقف ءِ امنا کننگ پاکستان نا سرسہبی ءِ۔