بلوچستان حکومت ءَ را وٹس اپ حکومت گوشوک گراؤنڈ ءَ بروانت ءُ  وتی چماں پچ بکن انت ءُ بچار انت، بلوچستان ءِ سروزیر  جام کمال خان ءِ دیمروئی کار سہرا انت، عوامی پارٹی ءِباسک مینا مجید بلوچ

27-مارچ(اےپی پی)  عوامی پارٹی ءِ باسک بانک مینا مجید بلوچ ءَ جمعہ ءِ روچ ءَ گرلز ڈگری کالج ہوشاپ ءِ ترءُ تاب کت۔ ترءُ تا ب ءَ آئی ءَ بلوچستان حکومت ءِ نیمگ ءَ جوڑ بوہوکیں گرلز ڈگری کالج ءِ ماڑی ءِ چارءُ تپاسی کت۔آئی ءَگشت کہ  اے دیمروئی ءِ کاربلوچستان ءِ سروزیر جام کمال خان ءِ حکومت ءِ دور ءِ کار اَنت کہ گوں گشادی ءَ سرجم بوہگ ءَ اَنت۔ کالج ءِ پرنسپل ءَ آئی ءَ را گوشت کہ اے کالج ءَ نودربرانی کساس 10 بوتگ بلے انوں الحمداللہ 800 اِنت۔ آئی ءَ گوشت کہ استیں حکومت ءَ پہ نودربرانی گہتریں آسراتی ءِ ھاترءَ کالجءَ را  بسے داتگ کہ آ  پہ نودرانی ھاترءَ تاں 30 کلومیٹر رؤت۔ بانک مینا مجید ءَ گیش گشت کہ  حکومت ءَ اے کالج ءَ را ڈگری کالج ءِ درجگ داتگ ءُ ایشی ءَ ابید بلوچستان ءِ درستیں انٹر کالج ڈگری کالج ءِ درجگ دیئگ بوتگ اَنت۔ آئی ءَ گشت کہ گند ءُ نند ءَاے اِشکنگ ءَ من ابکا بوتاں کہ پہ کالج ءِ ھاتر دگہ ایچ لوٹ نیست چیا کہ سائنسی سامان، کلاس روم، ٹیچر، بس ءُ ایندگہ آسراتی سرجم اَنت۔ پیسر ءَ ٹیچر ءِ کمی بوتگ بلے منیسٹر ظہور احمد بلیدی ءَ بلوچستان ءِ سروزیر جام کمال خان ءِ پنتءُ شون ءِ ردءَ کنٹریکٹ ءِ سرءَ ملازم داشتگ۔ آئی ءَ گیش گشان کت ءُ گوشت کہ اے وہد ءَ جنک یک جوانیں ءُ پُرآسراتیں چاگردے ءَ گوں سائنسی ایگزیبیشن ءِ تیاری ءَ دزگٹ اَنت۔ اسکول ءِ پرنسپل محمد راشد ءِ جہد ءُ  کوشستاں ڈگری کالج ہوشاپ ءِ اے جوانیں چاگرد ءِ واب راست بوتگ آئی ءِ جہد ءُ کوشست لکھ ستاہ کرز اَنت ءُ ما آئی ءِ اے کوشستاں ساڑااَں۔  آئی ءَ  گوشت کہ بلوچستان حکومت ءَ را وٹس اپ حکومت  نامینوک وتی چماں پچ بکن انت ءُ   گراؤنڈ ءَ بروانت ءُ   سروزیر  جام کمال خان ءِ دیمروئی کاراں بچار انت۔