نوشہرہ۔ 15 مارچ (اے پی پی) وزیراعظم عمران خان فوڈ سیکورٹی، ودوک آ آبادی، روزگار نا فراوانی، موسمیاتی بدلی، کچٹی و زرمبادلہ نا کمتی ءِ ملک اکن بھلو چیلنج اس گوندساپارینے کہ کشاری ملک مننگ آن پد ہم پاکستان خولم و بورہ درآمد کننگ ءِ، زیتون نا دسنگ آن زرمبادلہ نا بچت و روزگار نا وارخواہی ملک، پاکستان موسمیاتی بدلی آن غٹ آن زیات زہمی 10 ملک آتیٹی اوار ءِ، مچ آ ملک اٹ میوہ ئی درخت آتا دسنگ کن علاقہ جتا کننگک، ودوک آ آبادی کن فوڈ سیکورٹی حکومت نا زمواری ءِ، ورناو طالب علم آک بلین ٹری سونامی شجرکاری مہم اٹ پبی بشخ ہلیر، پاکستان اٹ اگہ نن زیتون دسنگ آ چکار تخن تو سپین نا مقابلہ ٹی زیات کنوئی آ تیل برآمد کننگ کینہ۔ داخیال آتا درشانی ءِ او دوشنبے نادے آ داڑے زیتون نا شجرکاری مہم نا بناءِ کننگ نا دود آن تران کرسا کرے۔داوخت آ وزیر دفاع پرویز خٹک، وزیر مملکت موسمیاتی بدلی زرتاج گل، وزیراعظم نا خصوصی کمکار موسمیاتی بدلی ملک امین اسلم، گورنر خیبرپختونخوا شاہ فرمان، وزیراعلیٰ خیبرپختونخوا محمود خان ئسک ہم ساڑی ئسر۔ وزیراعظم پارے کہ خیبرپختونخوا ٹی زیتون دسنگ آ گورنرشاہ فرمان نا کوشست آتا ستاءِ کیوہ۔ اوپارے کہ زیتون نا پیدوار آن نئے بیرہ خیبرپختونخواہ بلکن مچ آ ملک آ جوان ءُ اثراس تمک۔ ملک ءِ داوخت آ بھلو چیلنج مون تروک ءِ ہرافتیان اسٹ فوڈ سیکورٹی ءِ۔ اسہ وخت اس ئس کہ پاکستان خولم برآمد کریکہ۔ تدوک آ اِرسال اٹ 30 لکھ ٹن خولم درآمد کننگا و کشاری ملک مننگ آن پد ہم اینخو نا سال 40 لکھ ٹن خولم درآمد کرینے۔ داکان بیدس بورہ ہم ننے درآمد کروئی تمانے۔ کنوئی آ تیل و پام آئل مہالو آن درآمد کنننگ اُن۔ ودوک آ آبادی کن فوڈ سیکورٹی بھلو چیلنج اسے۔ حکومت نا اولی زمواری دادے کہ او فوڈ سیکورٹی ءِ پک کے۔ ملک انا ارٹ میکو ویل زرمبادلہ نا کمتی ءِ۔ مستین اٹ پاکستان ءِ ریکارڈ واپاری نسخان مون تروک مسنے و ننا درآمد آک 60 ارب ڈالر و برآمد آک بیرہ 20 ارب ڈالر ئسر۔ داسہ برآمدآتیٹی ودکی مسنے۔ درآمد و برآمد آتا نیام اٹ پرخ اٹی کمتی بسنے۔ وزیراعظم پارے کہ موسمیاتی بدلی ہم پاکستان کن بھلو چیلنج اسے و پاکستان ماحولیاتی بدلی نا غٹ آن زیات زہمی مروک آ 10 ملک آتیٹی اوار ءِ۔ ننا آبادی ٹی ودکی مننگ ءِ و ملکی آبادی نابھلا بشخ ورناتیا تالان ءِ ہرافتے روزگار تننگ ہم چیلنج اسے۔ کچٹی ہم اسہ بھلو چیلنج اسے۔ اوپارے کہ ٹین بلین ڈٹ انا مسخت بروک آ چین تے ماحولیاتی بدلی نا اثرآتیان رکھ کننگ ءِ۔ ورناک، طالب علم و لمہ باوہ غاک بلین ٹری سونامی شجرکاری مہم اٹ پبی بشخ ہلیر۔اوپارے کہ زیتون نا دسنگ آن نئے بیرہ چاگڑد سرسوز مریک بلکن کنوئی آ تیل درآمد کروئی تمپک و زرمبادلہ نا بچت مریک۔ اوپارے کہ خیبرپختونخوا ٹی کوہ سلیمان و قبائلی علاقہ زیتون دسنگ کن گچین ءُ ہند ءُ۔ بلوچستان و پنجاب اٹی ہم زیتون دسنگ انگ ءِ۔ زیتون نا درخت کیہی سد سال اسکان میوہ ایتک۔ اوپارے کہ پاکستان ءِ اللہ تعالیٰ 12 موسم تسنے ولے دا موسم تیان فائدہ ہرفنگتنے۔ زیتون دسوک آ علاقہ غاتیٹی پراسیسنگ و ایلو گام گیج آتیان ورناتے روزگار ملک۔ ورناتے دا چرجوئی ٹی نگہبان کننگ مریک۔ اوپارے کہ اسپین زیتون نا تیل بھاز زیات برآمد کیک۔ پاکستان اٹی ہم زیتون دسنگ نا بھلو گنجائشت اس ارے۔ اگہ نن زیتون دسن تو اسپین آن زیات زیتون نا تیل برآمد کننگ کینہ۔ وزیراعظم پارے کہ کچٹی نا ویل اتون مون تننگ کن شار تیٹی میاواکی اسہ ہندن ءُ وڑاسے ہراڑآن 30 سال انا جاگہ غا جنگل 10 سال اٹ خلنگ مریک۔ لاہور اٹی 50 ہند آتیا دا ڈٹ انا بناءِ کننگانے۔ پشاور اٹی ہم بھاز کچٹی ءِ۔ داڑے ہم میاواکی ناوڑانا جنگل ناڈٹ آتا کمک اٹ نیال خلنگ کینہ۔ بروک آ چین تا جان جوڑی کن داکنڈآ چکار کروئی مریک۔ داکان مست دود آن تران کرسا گورنر شاہ فرمان خیبرپختونخوا ٹی زیتون نا شجرکاری نا بابت کروک آ گام گیج آتیان وزیراعظم و دود اٹی بشخ ہلوک آتے معلومدار کرے۔
