اسلام آباد۔ 12 فروری (اے پی پی) وزیر خارجہ مخدوم شاہ محمود قریشی امریکی محکمہ خارجہ نا ٹویٹ نا بابت بائیڈن انتظامیہ نا ترجمان نا وضاحت نا خیرمقدم ءِ کرسا پارینے کہ کشمیر نا بابت امریکی پالیسی ٹی ہچ ءُ بدلی اس اف او اینو ہم دادے اسہ امنا مروک ءُ جھیڑہ اس تکرہ ہرا ایسر نا چاری ءِ۔ وزیر خارجہ جمعہ نادے آ تینا اسہ بیان اسے ٹی پارے کہ اسہ ٹویٹ اس مون آ بس ہرانا نن نوٹس ءِ ہلکن و دمدستی تینا موقف ءِ پیش کرین۔ ای خوش اُٹ کہ بائیڈن انتظامیہ نا ترجمان اونا وضاحت ءِ کرینے کہ کشمیر نا بابت اونا پالیسی ٹی ہچ ءُ بدلی اس اف او اینو ہم دادے اسہ امنا مروک ءُ جھیڑہ اس تکرہ ہرا ایسر نا چاری ءِ۔ وزیر خارجہ پارے کہ مچ آ دنیا ٹی کورونا جہانی دینی چیلنج آن پد دنیا نا زرگزرانک زہمی مسنو ہرانا سوب آن جہانی کہول آ اسہ زرگزرانی تنکی اس مون آ بسنے۔ ہنداوڑ خلیجی ملک آتا زرگزرانک ہم زہمی مسنو نتیجتا ملازمت آتیٹی کمتی مس و بھاز انگاتے پدی بروئی تما۔ داکان بیدس مچ آ دنیا ٹی ایرلائن بزنس تنکی نا گواچی مس، ہوٹل، ریسٹورنٹ لاک ڈاؤن پابندی تا سوب آن زہمی مسر و کنسٹرکشن انڈسٹری بھاز بے وڑ زہمی مس۔ شاہ محمود قریشی پارے کہ منہ وخت مست متحدہ عرب امارات آ ہناٹ کنا یواے ای نا وزیر خارجہ تون سرجم ءُ نشست اس مس۔ وزیر خارجہ وضاحت کرسا پارے کہ یواے ای نا گڑتیک پاکستان نا بابت خاص افس نن اوفتا گڑتی تے مُر کننگ اُن ننا گپ وتران برجاءِ، انشاء اللہ گچینی نا گمان ءِ۔ اوپارے کہ مشن امن 21 ننا بھاز بھلو سرسہبی اسے 40 ملک آتا بحریہ دا مشق آتیٹی بشخ ہلنگ ءُ، بلیو اکانومی آ گپ وتران مریک و ای زوت نیول چیف نا سلہ غا کراچی آ ہِننگ اٹی اُٹ۔
