اسلام آباد۔ 26 جنوری (اے پی پی) تحریک انصاف نا باسک قومی اسمبلی فرخ حبیب پارینے کہ مولانا فضل الرحمان نا برخلاف اونا جماعت نا سینئر راہشون حافظ حسین احمد نا کنڈآن فارن فنڈنگ نا چندی ٹاک شوتیٹی اعتراف نا بنداو آ الیکشن کمیشن اٹ درخواست دائر کرینن، الیکشن کمیشن مولانا فضل الرحمان و حافظ حسین احمد ءِ ہم 24 فروری آ بٹنگے۔ فارن فنڈنگ نا بنداو تخوک آ غٹ جماعت آک یکجا مسنو، داہراباہ اٹ فارن فنڈنگ نا سوج ءِ کننگ ءُ۔ سے شنبے نادے آ الیکشن کمیشن اٹ جمعیت علمائے اسلام نا برخلاف فارن فنڈنگ نا جاست وپاست کن درخواست جمع کرفنگ آن پد میڈیا تون گپ وتران کرسا اوپارے کہ حافظ حسین احمد کیہی وار میڈیا غا ٹاک شوزاٹی اعتراف کرے کہ مولانا فضل الرحمان عراق و لیبیا غان فارن فنڈنگ ہلک۔ دانا جاست وپاست بایدے مرے۔ اوپی ٹی آئی آ فارن فنڈنگ نا دوبہ ءِ خلک و الیکشن کمیشن نا مون آ برانز کرسا کریر ولے داسہ اوفتا تینا فارن فنڈنگ نا پڑدہءِ اوفتا سینئر راہشون پاش کرے۔ مولانا فضل الرحمان نا ڈی آئی خان و چک شہزاد نا جائیداد ہم ہندا زر آن ہلنگور۔ اوپارے کہ مولانا فضل الرحمان ءِ نرنگ کن الیپس اودے تینا ورندی ءِ تروئی تمک۔ اوپارے کہ فارن فنڈنگ نا بنداو ءِ نواز شریف تخا و اواسامہ بن لادن آن زالبول نا حکمرانی نا چٹفنگ کن 10 ملین ڈالر ہلک۔ بے نظیر بھٹو تینا آپ بیتی ٹی دا بارواٹی نوشتہ کرینے۔ اوپارے کہ عمران خان اودے چیلنج کرے کہ سکروٹنی کمیٹی ٹی فارن فنڈنگ کیس انا سماعت اوپن مرے یا مون آ برے و او چیلنج ءِ قبول کرے۔ اسہ سوج اسے نا ورندی ٹی اوپارے کہ نن سکروٹنی کمیٹی ءِ غٹ ریکارڈ فراوان کرینن مولانا فضل الرحمان و مریم نواز ءِ ہم تینا رسید آتے تسن۔ مولانا فضل الرحمان پائے کہ او ہرا ایجنڈا نا رداٹ فارن فنڈنگ ہلک، انت لانگ مارچ اکن ہم فارن فنڈنگ مس۔
