اسلام آباد۔ 15 اپریل (اے پی پی) پاکستان اسرائیلی کوزہ گیر فوج انا کنڈآن غزہ ٹی بیپٹسٹ ہسپتال آ بمباری نا ترندی اٹ مذمت ءِ کرسا پارینے کہ دا جلہو ، طبی آسراتی تے شست کننگ نا بشخ و جہانی انسانی کانود نا خلاف ورزی ءِ ۔ ترجمان دفترخارجہ نا کنڈآن سے شنبے نادے آ جاری بیان نا رداٹ دا جلہو پام سنڈے آ پیش بس ہرا عیسائی تیکن اسہ مقدس ءُ موقع اسے و دا اسرائیل نا مذہبی تقدس و شاری زند آتے گوجالنگ نا پیدواری ءِ کیک۔ اوپارے کہ پاکستان اسرائیل نا برجا ظلم ءِ دمدستی وڑاٹ بند کننگ نا خواست کیک ہراٹی زالبول و چناتتون اوار کودک فلسطینی تا خون و شاری انفراسٹرکچر ءِ سجفوک وڑاٹ بھس کننگ انگ ءِ۔ ترجمان پارے کہ اسرائیل نا لاتعداد جلہوآک غزہ نا جان جوڑی نا چیٹ انا نظام ءِ ژند کرینو، ہراڑآن بھاز ناجوڑ مریض آتے طبی امداد آن محروم کننگانے۔ اوپارے کہ انسانی امداد ناناکہ بندی اتون اواری اٹ دا گام گیج مصیب آتے مرغن کننگ و جھیڑہ غاتے ودفنگ کن دانستہ حکمت عملی نا عکاسی ءِ کیک۔ ترجمان پارے کہ پاکستان اسرائیلی کوزہ گیر فوج انا کنڈآن دشمنی ءِ دمدستی وڑاٹ توننگ نا خواست کیک و اِرا ریاستی ایسری کن تینا مخ تفی نا درشانی ءِ کیک ہراٹی جون 1967آن مست انا سیم تیا تالان اسہ قابل ءُ عمل، آجو و وتواجہ فلسطینی ریاست اسے نا ٹہیفنگ اوارءِ ہرانا دارالحکومت القدس شریف مرے۔ بیان اٹی پاکستان جہانی برادری آ زور شاغانے کہ او اسرائیل ءِ جوابدہ گوندفنگ و فلسطینی شاری تے پین بیدادی آن بچفنگ کن فیصلہ کن گام گیج کے۔
