سرینگر۔ 26 جنوری (اے پی پی) کنٹرول لائن نا ہڑتوم آ کنڈ و مچ آ دنیا ٹی رہینگوک آ کشمیریک سے شنبے نادے آ بھارت نا یوم جمہوریہ ءِ تہاردے انا وڑاٹ اڈتسر تانکہ جہانی برادری آ زور شاغنگ مرے کہ او بھارت نا کنڈآن کشمیری تے اوفتا حق خودارادیت تننگ آن پدریسہ انکار نا نوٹس ءِ ہلے۔ کشمیر میڈیا سروس نا رداٹ تہاردے ءِ اڈتننگ نا کال ءِ کل جماعتی حریت کانفرنس، میر واعظ عمرفاروق نا کماشی ٹی جوڑ حریت فورم و ایلو حریت راہشون و تنظیمک تسوسر۔ سے شنبے نادے آ مقبوضہ جموں و کشمیر اٹی پورو ہڑتال مس و آزاد کشمیر، پاکستان و مچ آ دنیا نا دارالحکومت آتیٹی بھارت مخالف مچی و ریلی کشنگا۔ ایڑے مچ آ مقبوضہ علاقہ خاص کر کشمیر کرکٹ اسٹیڈیم تون اوار 26 جنوری نا سرکاری دود آتا ہند آتا دامون ایمون بھارت مخالف مچی تے توننگ کن بھارتی فورس آتا بھلو نفری اس تعینات کننگا۔ سرینگر اٹ مسہ جاگہ غاتیا تالان سیکورٹی بست وبند کننگانے و مچ آ مقبوضہ علاقہ ٹی جاگہ جاگہ غا جوڑ کروک چوکی تیا مخلوق ءِ تورسا اوفتے پٹنگا۔ بڑزکو ماڑی تیا چاہندار نشانہ باز تعینات کننگا وخت اس کہ کشمیر اسٹیڈیم سرینگر ہراڑے بھارتی یوم جمہوریہ نا سرکاری دود اڈ ہلیک و اونا نواحی علاقہ غاتا کنڈآ ہنوک آ روڈ آتیا ڈرون کیمرہ غاتا کمک اٹ نظر تخنگا تانکہ بھارت مخالف مچی تے توننگ مرے۔ سونہ وار ہروڑنا ہن و بر کن بند ئس و مخلوق ءِ گیگ بدل کسر اختیار کننگ نا پارت کرسا کننگا۔ کوزہ گیر انتظامیہ نا کنڈآن خاص کر شناختی کارڈ جاری کننگا۔ مچ آ شار اٹی چندی ہند آتیا چوکی جوڑ کننگا ہراڑے گاڈی و مسافر آتا جامہ تلاشی ءِ ہلسا کننگا۔
