اسلام آباد۔ 15 اپریل (اے پی پی) ڈپٹی چیئرمین سینیٹ سیدال خان پارینے کہ پاکستان و یورپی یونین نا نیام اٹ شریداری جمہوریت، امن و تین پہ تینی شرف نا بنداوآ قائم ءِ، یورپی یونین۔پاکستان بزنس فورم بھاز اہمیت تخرہ ہراڑآن چندی بشخ آتیٹی کمکاری ءِ مون آ دننگک۔ داخیال آتا درشانی ءِ او سے شنبے نادے آ سربان ڈیمتر یے اسٹردذ نا کماشی ٹی یورپی یونین نا پارلیمانی ڈل اتون گپ وتران کرساکرے ہراسے شنبے نادے آ داڑے اوڑتون اوڑدہی کرے۔ ڈپٹی چیئرمین سینیٹ سیدال خان پارے کہ پاکستان ، یورپی یونین تون تعلقداری ءِ قدر انا نظر اٹ ہرک، اودے واپار، زرگزران و زرکاری ٹی ودفنگ خواہک، پارلیمانی سفارتکاری السی رابطہ و کمکاری ءِ مون آ دننگ کن بھاز حیثیت تخک، پاکستان و یورپی یونین نا نیام اٹ شریداری جمہوریت، امن و تین پہ تینی شرف نا بنداو آٹی ءِ۔ اوپارے کہ واپار ، سلامتی و ادارہ جاتی کمکاری ٹی ہڑتوم آ کنڈآتا تعلقداری تا خڑکی است بڈ ءِ، یورپی یونین پاکستان نا اہم واپاری شریدارءِ، جی ایس پی پلس اسکیم آن ہڑتوم آ کنڈآتا واپار اٹی نمان ودکی مس۔ اوپارے کہ یورپی یونین۔ پاکستان بزنس فورم بھاز اہمیت تخرہ ہراڑآن چندی بشخ آتے مون آ دننگ دوئی مریک، پاکستان ایس آئی ایف سی کون آ گام گیج آتیان سازگار ، شفاف و کاروبار دوست زرکاری چاگڑد فراوان کننگ ءِ۔ ڈپٹی چیئرمین سینیٹ سیدال خان یورپی زرکارآتے پاکستان اٹ قابل تجدید توانائی، ڈیجیٹل بدلی، معدنی شونداری و ٹرانسپورٹ اٹی زرکاری نا سلہ ہم خلک۔ سیدال خان پارے کہ پاکستان نا زرکاری پالیسی یورپی یونین نا گلوبل گیٹ وے حکمت عملی تون ہم گرنچ ءِ۔ اوپارے کہ پاکستان اقلیت آتے پورو مذہبی آجوئی ایتک و آئین ءِ پاکستان اٹ غٹ اقلیت آتے بنداوی حق دوئی ءِ، یورپی یونین انسانی حق انا علمبردار ملک آک ءُ، فلسطین و کشمیری تیکن مثبت توار بڑز کیر۔ اوپارے کہ فلسطین و کشمیر نا انصاف اٹ ایسر جہانی امن نا ضمانت ءِ، یورپی ڈل انا دورہ ہڑتوم آ کنڈآتا کمکاری ، و سٹریٹجک شریداری ءِ پین سوگو کیک۔ داوخت آ سینیٹر بشریٰ انجم بٹ پارے کہ پاکستان ورناآبادی کن تعلیم و مہارت آتیٹی زرکاری کننگ ءِ، تعلیم ، وظیفہ و طالب علم آتا تبادلہ کون آ پروگرام یورپی یونین تون تعلقداری ٹی اہم تمبہ ءُ۔ سینیٹر روبینہ قائم خانی پارے کہ پاکستان اٹ زرکاری نا بھلو وارخواہی اس ساڑی ءِ، یورپی یونین نا زرکارآک صوبہ سندھ آن ہم پبی فائدہ ہرفنگ کیرہ۔ ڈپٹی چیئرمین سینیٹ سیدال خان پارے کہ پاکستان جہانی معاہدہ غاتا پاسداری ءِ کرسا جہانی برادری ٹی باپت شریدار نا وڑاٹ مون آبننگ ءِ، 2026اٹی برسلز اٹی جہانی کانفرنس اٹی پاکستان نا کماشی اہم ءُ مزل نا نشان اس مریک۔ سینیٹر گردیپ سنگھ پارے کہ پاکستان امن پسند ءُ ملک اسے و پاکستان اٹ اقلیت آتے پورو مذہبی آجوئی دوئی ءِ، پاکستان اٹی رہینگوک آ غٹ اقلیت آک تینا مذہبی رسم آتے آجوئی اٹ اداکیرہ۔ ڈپٹی چیئرمین سینیٹ پارے کہ پارلیمانی ڈل آتا ہن وبر ہڑتوم آ کنڈآتا کمکاری ءِ پوسکن ءُ جہت اس تننگ اٹ کمکار جوڑ مننگ ءِ۔
