پاکستان، اوغانستان اٹ امن ءِ ڈیہہ نا امن و سوگوی کن المی تکک، شاہ محمود قریشی

اسلام آباد۔ 10 دسمبر (اے پی پی) وزیر خارجہ شاہ محمود قریشی پارینے کہ پاکستان، اوغانستان اٹی امن ءِ ڈیہہ نا امن و سوگوی کن المی تکک۔اینو دنیا اوغانستان اٹ امن کن پاکستان نا خیرخواہی کوشست آتا ستاءِ کننگ ءِ۔ داہیت ءِ او پاکستان اٹ تعینات اوغانستان نا پوسکن آ سفیر نجیب اللہ علی خیل تون گپ وتران کرسا پارے ہرا پنچ شنبے نادے آ وزارت خارجہ ٹی اوڑتون اوڑدہی کرے۔ اوڑدہی ٹی وزیراعظم نا دورہ کابل، پاک اوغان تعلقداری و اوغانستان اٹی برجا امن عمل آ گپ وتران مس۔ وزیر خارجہ پاکستان اٹ بطور اوغان سفیر زمواری سنبھالنگ آ نجیب اللہ علی خیل ءِ مبارکبادی تس و پارے کہ پاکستان و اوغانستان نا نیام اٹ دیرینہ برادرانہ تعلقداری ءِ۔ نائیجر اٹ او آئی سی وزرائے خارجہ کونسل نا چل ءُ ہفت می دیوان نا وخت آ کنے اوغان ہم منصب تون اوڑدہی نا موقع رسینگا۔ شاہ محمود قریشی پارے کہ اوغان وزیر خارجہ اوغان امن عمل اٹ پاکستان نا کوشست آتا ستاءِ کرے۔ پاکستان، اوغانستان اٹ امن ءِ ڈیہہ نا امن و سوگوی کن المی سمجھ۔ک۔ وزیر خارجہ پارے کہ وزیراعظم عمران خان نا دورہ کابل آن ہڑتوم آ ملک آتا نیام اٹ کثیر الجہتی بشخ آتیٹی ہڑتوم آ کنڈآتا کمکاری ءِ مون آ دننگ نا کسر آک آوار مسنو۔ اینو دنیا اوغانستان اٹی امن کن پاکستان نا خیرخواہی نا کوشست آتا ستاءِ کننگ ءِ، مخدوم شاہ محمود قریشی پارے کہ نن اوغانستان اٹی امن تون، اوغان باہوٹ آتا شرفمندی اٹ پدی ہِننگ نا خواہندار اُن۔ ہڑتوم آ ملک آتا نیام اٹ واپاری مراسم نا مون آ دننگ کن اولیتی واپاری معاہدہ غا مذاکرات کن آمادگی است جمی نا سوب ءِ۔ اوغان سفیر نجیب اللہ علی خیل وزیر خارجہ نا منت واری ءِ ہرفسا پاک اوغان تعلقداری نا مون آ دننگ کن تینا پبی کوشست آتے کاریم اٹ اتنگ نا باوری کرفے۔