اقوام متحدہ۔ 12مئی (اے پی پی) پاکستان اقوام متحدہ آن خواست کرینے کہ او کشمیری و فلسطینی تتون برجاءنا انصافی ئِ بند کرفے۔ اقوام متحدہ ٹی پاکستان نا آخبتی مندوب ڈاکٹر ملیحہ لودھی جنرل اسمبلی ٹی امن وسلامتی نا سرحال آ اسہ شرہ سیٹی بشخ ہلسا پارے کہ کشمیری و فلسطینی تے حق خودارادیت آن انکار برجاءسلک و بھلو وخت اسیان ایسر نا چاری دا ہڑتوم آ ویل آک ایسر مفسہ تو دا اقوام متحدہ نا کنڈآن دہرے معیار نا درشانی مریک۔ اوجہانی ادارہ آن خواست کرینے کہ او کشمیری و فلسطینی تتون تینا قرارداد آتے ٹی کروک آ وعدہ ئِ پورو کے۔ پاکستانی مندوب مستی پارے کہ جہانی ادارہ داوخت دنیا ئِ مون تروک ، اسلام فوبیا، بے سگی، دہشت گردی ، امتیازی سلوک و درملکی تیان خار کون آ چیلنج آتا مقابلہ ئِ کننگ کن کمکاری آ مبنی گچین گام گیج کے۔ پاکستانی مندوب یات دہانی کریفے کہ ریاست آتا وت واجہی نا لحاظ آن بریبری، بین الاقوامی جھیڑہ غاتا پرامن ایسری، واک ئِ کاریم اٹ اتنگ و اونا کاریم اٹ اتنگ نا دھڑکو آن پاناد اقوام متحدہ ناچارٹر اٹی ساڑی بنداوی اصول ئِ۔ جہانی ادارہ غاتا اڈتننگ نا مسخت ہی اوناانصافی تے توروئی ئس ہرافتے تون اینو کشمیر و فلسطین نا باتیک مون تننگ ئُ۔ اوسوج کرے کہ انت دا نا انصافی تے توننگ ننا اجتماعی زمہ واری اف۔ اوداسوج ئِ ہم کرے کہ سلامتی کونسل دامعاملہ غاتے بین الاقوامی عدالت انصاف ئِ انتئے گدریفپک و جنرل اسمبلی ئِ جہانی امن و سلامتی نا بابت تینا سفارشات آتے تننگ نا زمہ واری ئِ ادا کننگ آن انت اکن توننگک ۔ اگہ دا سوج آتا ورندی ئِ تفننگ پک تو جہانی برادری اقوام متحدہ ئِ منہ وکدار آتا دوتے ٹی سیاسی آلہ کار آن زیات ہچ اس سرپند کپک و داڑآن جہانی ادارہ نا ساکھ زہمی مریک۔ جہانی برادری جمہوری اقدار، احتساب، شفافیت و کانود ناحکمرانی کون آ اقدار نا ناگزیریت ئِ امنا کیک و تینا اقدار آ عمل کریسہ ساڑی بین الاقوامی چیلنج آتون مون تننگ کن لائخی ودی کننگ مریک۔ پاکستانی مندوب پارے کہ 2030 ءاسکان کن سوگو شون نا ہدف و ماحولیاتی رکھ انا جاہنی معاہدہ نا منظوری ٹی ہراجوش و جوزہ نا درشانی ئِ کننگا او امن و سلامتی نا بابت خننگ تنے۔اوداوخت آ اسہ وارولدا سلامتی کونسل اٹی اصلاحات آتا بابت کونسل نا آخبتی مہشون آتے ٹی ودکی نا مخالفتئِ کرے۔
