اسلام آباد۔ 20 نومبر (اے پی پی) وزیراعظم عمران خان پارینے کہ تعمیراتی کاریم اٹی ترندی اٹ ملکی زرگزران اٹی گچینی بریک و مخلوق ءِ روزگار نا وارخواہی دوبریک، پنجاب حکومت تعمیراتی کاریم نا بابت ملوک آ درخواست آتے مروجہ کانود نا رداٹ زوت منظور کے و تعمیراتی بشخ اتون تعلقدار ویل آتے دمدستی ایسر کننگے۔ داخیال آتا درشانی ءِ او قومی رابطہ کمیٹی ہاؤسنگ ، تعمیرات و ڈویلپمنٹ نا ہفتہ وار دیوان نا کماشی ءِ کرسا کرے۔ دیوان اٹی وزیراعظم نا خصوصی کمکار موسمیاتی بدلی ملک امین اسلم ، سلاہکار اصلاحات ڈاکٹر عشرت حسین، سیاسی رابطہ غاتیکن وزیراعظم نا خصوصی کمکار شہباز گل، بنجائی و صوبائی سیکرٹریز و سینئر آفیسر آک بشخ ہلکر۔ گورنر اسٹیٹ دیوان ءِ معلومدار کرے کہ بینک آتا کنڈآن نیا پاکستان ہاؤسنگ اسکیم نا رداٹ ہندآتا تفنگ کن وام دوئی کننگ اٹ آسراتی تا فراوانی ءِ پک کننگ انگ ءِ۔ اوپارے کہ الس نا آسانی کن مچ آ ملک انا غٹ ضلع غاتیٹی ساڑی بینک آتا پنجا درسد برانچ آتیٹی تعمیرات کن وام تا فراوانی کن خصوصی ڈیسک اس جوڑ کننگک۔ بینک الحبیب نا کنڈآن دیوان ءِ معلومدار کننگاکہ تعمیراتی بشخ اکن داتم اسکان 6 ارب روپئی منظوری تننگانے۔ چیف سیکرٹری پنجاب دیوان ءِ پارے کہ مچ آ صوبہ غان 44 ملین مربع فٹ ا تعمیراتی کاریم کن درخواست ملانے ہرافتیان 20 ملین مربع فٹ آتعمیرات کن منظوری تننگانے۔ اومستی پارے کہ تعمیرات تون وابستہ غٹ صںعت بشمول سیمنٹ، خشت، و سریا نا کھپت اٹ ودکی مسنے۔ دیوان ءِ پاننگاکہ پنجاب اٹی 44 ملین مربع فٹ آ تعمیراتی کاریم نا بناء مننگ آن پد سوبہ ٹی کم و ود 1 کھرب روپئی نا زرگزرانی سرجزآک بناکیرہ۔ چیف سیکرٹری خیبرپختونخوا دیوان ءِ معلومدار کرے کہ مچ آ صوبہ غان کم و ود 6 ملین مربع فٹ آ پوسکن آ تعمیرات کن درخواست رسینگانے۔ اوپارے کہ منظوری آن پد صوبہ ٹی 100 ارب روپئی نا زرگزرانی سرجزآک بناکیرہ۔ وزیراعظم عمران خان پارے کہ تعمیراتی کاریم اٹی ترندی آن ملکی زرگزران گچین مریک و مخلوق ءِ روزگار نا وارخواہی دوبریک۔ وزیراعظم پنجاب حکومت ءِ تعمیراتی کاریم نا بابت ملوک آ درخواست آتے مروجہ کانود نا رداٹ زوت آن زوت منظور کننگ نا پارت ہم کرے۔ وزیراعظم پارت کرے کہ پاکستان ٹیلی کمیونیکیشن و نیپرا ءِ اسٹیٹ بینک آف پاکستان تون اواری اٹ تعمیراتی بشخ اتون تعلقدار ویل آتے زوت ایسر کیر۔ وزیراعظم نیا پاکستان ہاؤسنگ اسکیم نا بابت آگاہی تالان کننگ آ ہم زور شاغا۔
