اسلام آباد۔ 20 نومبر (اے پی پی) وزیراعظم عمران خان نا کماشی ٹی جمعہ نادے آ پاکستان آئی لینڈ ڈویلپمنٹ اتھارٹی و راوی اربن ڈویلپمنٹ اتھارٹی نا ورکنگ گروپس نا دیوان اس اڈ ہلک ہراٹی گورنر سندھ عمران اسماعیل و چیف سیکرٹری پنجاب جواد رفیق ملک ویڈیو لنک انا کمک اٹ بشخ ہلکر۔ وزیراعظم آفس نا میڈیا ونگ آن جاری بیان نا رداٹ وزیراعظم ءِ ہڑتوم آ ڈٹ اتیا مروک آ داتم اسکان نا پیش رفت آن معلومدار کننگا۔ وزیراعظم ءِ پاننگاکہ راوی سٹی و جزائر آ جوڑ کروک آ شار ملکی تاریخ اٹی اولیکو وار سرسوز شار(گرین سٹی) نا اصول آتا رداٹ مریک۔ چیئرمین راوی ڈویلپمنٹ اتھارٹی پارے کہ تعمیرات کن 18600ایکڑ ڈغار نا سروے پورو مسنے ہراٹی ہندی آبادی ءِ بے دخل کننگ یا پین جاگہ اس گدریفنگ نا گرج اف۔ اومستی پارے کہ راوی سٹی ڈٹ جہانی آب انا ہنکین تون اوار اوار نکاسی آب، ڈغار اٹی دیر انا کوڑی تا دستیابی و رکھ و ماحولیاتی رکھ انا بابت ڈیہہ ٹی قابل تقلید نمونہ پک مریک۔ یات سلے کہ دا ڈٹ وام انا جاگہ غا شریداری نا بنداو آ جوڑ کننگ انگءِ ہراٹی زرکاری کن جہانی ادارہ و زرکار آک است خواہی نا درشانی ءِ کننگ ءُ۔ چیئرمین پاکستان آئی لینڈ ڈویلپمنٹ اتھارٹی وزیراعظم ءِ آئی لینڈ ڈویلپمنٹ اتھارٹی نا ماسٹر پلاننگ و ماحولیاتی مطالعہ نا رداٹ جہانی کمپنی تا بھلو کچ اسے ٹی است خواہی نا بابت معلومدار کرے۔ وزیراعظم پارے کہ پاکستان نا سمندری پٹی سیل و سوات و جہانی آب انا شاری تعمیرات کن نئے بیرہ جوان ءِ بلکن پیشن نا زرکاری نا ان گنت وارخواہی ودی کننگ نا لائخی تخک۔ اومستی پارے کہ راوی سٹی ڈٹ لاہور کون آ بھلا شار آ آبادی نا زور ءِ کم کننگ تون اوار اوار پاکستان اٹ اربن پلاننگ نا پوسکن ءُ جہت درستی راستی کرفک۔
