اسلام آباد۔ 20 نومبر (اے پی پی) صدر مملکت ڈاکٹر عارف علوی ملک اٹی چناتا حق و رکھ اکن تینا عزم انا درشانی ءِ کرسا پارینے کہ اقوام متحدہ نا چناتا حق انا بابت کنونشن نا شریدار ناوڑاٹ پاکستان چناتا حق انا رکھ اکن غٹ قومی، علاقائی و جہانی کہول آ مخلصانہ کوشست کننگ ءِ، حکومت خاطر خواہ اصلاحات نا ایجنڈا ءِ مون آ درسا ہِننگ ءِ ہرانا چناتا زند آ مثبت اثرات مرتب مریک۔ داخیال آتا درشانی ءِ او یونیورسل چلڈرن ڈے انا وخت آ تینا کلہواٹی کرے۔ اوپارے کہ پاکستان اٹی ہرسال 20 نومبر آ یونیورسل چلڈرن ڈے چناتا حق انا رکھ انا عزم اتون اڈتننگک۔ اقوام متحدہ نا چناتا حق انا بابت کنونشن نا شریدار نا وڑاٹ پاکستان چناتا حق انا رکھ اکن غٹ قومی، علاقائی و جہانی کہول آ مخلصانہ کوشست کننگ ءِ۔ اوپارے کہ دا ننا اجتماعی زمواری ءِ کہ نن تینا چناتا رکھ ءِ کین و اوفتے ہروڑنا حیثیت، ذات پات، مسلک یا مذہب نا پرخ آن بیدس شونداری نا وارخواہی تسکان رسینگ فروان کین۔ حکومت تینا چناتے ہروڑنا استحصال، و پسماندگی آن بچفنگ کن سنبرینگوک ءِ، داڑتون اوار اوار حکومت چناتا زند انا ہر بشخ اٹ نمان کارکڑد نشان تننگ نا چاگڑد فراوان کننگ کن ہم کوشست کننگ ءِ، نن ملک اٹی چناتا حق و رکھ اکن تینا عزم انا درشانی ءِ کینہ۔ صدر مملکت پارے کہ حکومت خاطر خواہ اصلاحات نا ایجنڈا ءِ مون آ درسا ہِننگ ءِ۔ ہرانا چناتا زند آ جوان زہم تمک۔ ہرافتے ٹی بے گوا و برمتہ مروک چناتا رکھ اکن زینب الرٹ رسپانس اینڈ ریکوری ایکٹ 2020نا نافذ نوعمر چناتا نگہداشت و رکھ اکن جووینائل جسٹس سسٹم ایکٹ 2018 و آئی سی ٹی چائلڈ پروٹیکشن ایکٹ 2018 ء نا نافذ کون آ گام گیج آک اوار ءُ۔ اوپارے کہ حکومت دا بابت تینا زمواری تیان معلومدار ءِ ولے دارداٹ غٹ شریدار آتے ہم اسہ ہی کنڈاٹ کاریم کننگ نا گرج ءِ، چناتا راجی آسراتی کن غٹ سرکاری و غیر سرکاری ادارہ غاتا شریداری المی ءِ۔ میڈیا، کارپوریٹ سیکٹر، کمیونٹی ، لمہ و باوہ و استاد آتے مرے کہ او غٹ اسٹ مرسا چناتا زند ءِ گچین کننگ کن قومی کوشست آتیٹی تینا تعمیری کڑد ءِ ادا کیر۔
