صنعتی بشخ و پوریاگرآتے مون تروک ویل آتے اسہ وڑاسے ٹی ہم گوجالنگ مفک انتئے کہ دا بشخ ملکی زرگزران اٹ کلیدی کڑد ادا کننگ ءِ چیئرمین سینیٹ

 فیصل آباد۔ 20 نومبر (اے پی پی) چیئرمین سینیٹ محمد صادق سنجرانی پارینے کہ صنعتی بشخ و پوریا گر آتے مون تروک ویل آتے اسہ وڑاسے ٹی ہم گوجالنگ مفک انتئے کہ دا بشخ ملکی زرگزران اٹی کلیدی کڑد ادا کننگ ءِ، پارلیمان کاروباری تپہ و صنعتی بشخ انا ویل آتیان جوانی اٹ بلد ءِ۔ داخیال آتا درشانی ءِ او تینا ڈل اتون اوار فیصل آباد آ سرمننگ آ کرے۔ ڈل اٹی سینیٹرز سجاد حسین طوری، مرزامحمد آفریدی، احمد خان و کہدہ بابر اوار ءُ۔ چیئرمین سینیٹ محمد صادق سنجرانی پنی آ کاروباری شخصیت و زیڈاے کارپوریشن نا مالک شیخ دانش علی نا سلہ غا فیصل آباد آ سرمسنو۔ چیئرمین سینیٹ فیصل آباد اٹی شیخ دانش علی نا پوسکن آ انڈسٹریل یونٹ بیسٹ سپیسنگ مل انا ہم بناءِ کرے۔ چیئرمین سینیٹ محمد صادق سنجرانی ءِ کاروباری تپہ ءِ مون تروک ویل خاص وڑاٹ ٹیکسٹائل انڈسٹری نا مشکل آتا بابت حوال تننگا۔ چیئرمین سینیٹ ءِ پاننگاکہ پاکستان نا صنعتی بشخ خاص وڑاٹ فیصل آباد نا صنعتی یونٹس نئے بیرہ ملک اکن کثیر زرمبادلہ نا سوب ءُ بلکن زرگزرانی شونداری ٹی بنداوی کڑد انا حامل ءُ۔ چیئرمین سینیٹ صادق سنجرانی ءِ کاروباری و صنعتی بشخ ءِ خراج آتا بابت مون تروک ویل آتیان بیدس صںعت آتے بجلی نا فراوانی نا بابت ویل آتیان ہم معلومدار کننگا۔ داوخت آ چیئرمین سینیٹ پارے کہ پارلیمان کاروباری تپہ و صنعتی بشخ انا ویل آتیان جوانی اٹ بلد ءِ۔ صنعت کار آتے مون تروک ویل آتا ایسری کن پارلیمان تینا پبی کڑد ءِ ادا کیک۔ صنعتی بشخ نئے بیرہ ملکی زرگزران نا مخ انا ملی ءِ بلکن قومی شونداری کن ہم پبی بنداو فراوان کیک۔ اوپارے کہ صنعتی بشخ و پوریاگر آتے مون تروک ویل آتے اسہ وڑاسے ٹی ہم گوجالنگ مفک انتئے کہ دا بشخ ملکی زرگزران اٹ کلیدی کڑد ادا کننگ ءِ۔ شیخ دانش علی نا کنڈآن پوسکن آ سپیسنگ مل انا بناء ملکی زرگزرانی پالیسی تیا پت انا درشانی ءِ۔ کاروباری خواجہ غاک ملک اٹی زرکاری نا وارخواہی تیان فائدہ ہرفر۔ چیئرمین سینیٹ پارے کہ برآمد آتا مون آ دننگ کن آب اٹ مصنوعات تیار کننگے۔ پارلیمان اٹ خراج آتا نظام ءِ متوازن کننگ و کاروباری تپہ ءِ آسراتی فراوان کننگ کن گچین کانود سازی کننگ انگ ءِ۔ سینیٹ نا تعلقدار قائمہ کمیٹیک آخبتی بنداو تیا صنعتی و کاروباری بشخ ءِ مون تروک ویل آتا ایسری کن کوشست کننگ ءُ۔ اوپارے کہ پارلیمانی ڈل اتون اوار فیصل آباد نا دورہ ہم پارلیمان و کاروباری تپہ نا نیام اٹ گچین کمکاری و رابطہ کاری نا ڈیک ءِ۔ سیاست و زرگزران ءِ اسہ وڑاسے ٹی ہم جتا کننگ مفک۔