اسلام آباد۔ 20 نومبر (اے پی پی) بنجائی وزارت تعلیم و کسبی تربیت فاصلاتی نظام تعلیم نا نموکن اسہ پین مزل اسے نا کنڈآ پیش گامی کرسا ’ریڈیو اسکولز‘ نا جوڑ کننگ کن ریڈیو پاکستان، وزارت حوالکاری و شینکاری تون مفاہمت نا یات داشت آ دستخط کرے۔ مفاہمتی یات داشت نا دود اٹی بنجائی وزیر تعلیم شفقت محمود، بنجائی وزیر حوالکاری و شینکاری سینیٹر شبلی فراز، پارلیمانی سیکرٹری تعلیم وجیہہ اکرم، سیکرٹری تعلیم فرح حامد خان، سیکرٹری حوالکاری و شینکاری زاہدہ پروین بشخ ہلکر۔ ایڈیشنل سیکرٹری محی الدین احمد وانی و ڈائریکٹر جنرل ریڈیو عنبرین جان مفاہمتی یات داشت آ دستخط کریر۔ ریڈیو اسکولز نا جوڑ کننگ وزیراعظم پاکستان نا وژن نا روشنی ٹی اُراتسکان تعلیم نا رسینگ ءِ پک کننگ، کوویڈ۔ 19 نا زہم آتیان چناتے تعلیمی حرج آن بچفنگ کن بھاز اہم ءُ پیش رفت اسے۔ ریڈیو پاکستان نا رسینگ مچ آ پاکستان اٹ مننگ نا سوب آن مُرمُر انگا و پسماندہ علاقہ غاتا چناک بنجائی وزارت تعلیم نا دا گام گیج آن فائدہ دوئی کننگ کیرہ۔ ریڈیو اسکولز آن سہب انا 10 آن 12 بجہ اسکان تعلیمی پروگرام نشرکیک وخت اس کہ شام آ دُوارہ نشر کننگک تانکہ ورکشاپ آتیٹی کاریم کروک آ چناک شام آ فائدہ ہرفنگ کیر و تعلیم نا بنداوی حق آن محروم مفس۔ انٹرنیٹ و موبائل ایپ انا کمک اٹ ہم داپروگرام تیان فائدہ ہرفنگ مریک۔ بنجائی وزیر تعلیم پارے کہ ریڈیو اسکولز نا بھلا فائدہ ہمو چناتے مریک ہرافتا رسینگ سوب اسے آن اسکول اسکان اف حکومت پاکستان نا دا گام گیج آن اوہم تعلیم نا زیور آن آراستہ مریرہ۔ ننا حکومت مسن تے تعلیم تننگ کن تعلیم ءِ اُراتسکان دننگ ءِ۔ بنجائی وزیر تعلیم شفقت محمود پارے تدوک آ سال ہراتم کوویڈ۔ 19 نا سوب آن تعلیمی عمل زہمی مننگ نا گڑتی مس تو 15 دے انا تہہ ٹی وزارت تعلیم پاکستان ٹیلی ویژن نا کمک اٹ ٹیلی اسکول لانچ کرے ہراڑآن 80 لکھ چناہڑدے فائدہ ہرفنگ ءُ۔ وخت اس کہ ہرافتا رسینگ ٹی وی اسکان اف او ریڈیو اسکولز آن فائدہ ہرفرہ۔ اوپارے کہ دا گام گیج آتا مسخت دادے کہ فاصلاتی نظام تعلیم اٹ اسہ وڑاسے آ سیبو کننگ نا جاگہ غا ہررائج الوخت وڑاٹ فائدہ ہرفنگے۔ بنجائی وزیر تعلیم پارے زوت ای تعلیم پورٹل نا بناءِ کننگ والااُن ہرانا کمک اٹ ٹیلی اسکولز و ریڈیو اسکولز نا پرگرام تے اسہ کلک اٹ ہُننگ مریک۔ بنجائی وزارت تعلیم فاصلاتی نظام تعلیم نا شونداری کن پورو تندہی اٹ کاریم کننگ ءِ و دارداٹ وزارت تعلیم اٹی فاصلاتی تعلیم کن اسہ ونگ اس ہم جوڑ کرینے۔ بنجائی وزارت تعلیم زوت فاصلاتی تعلیم نا پالیسی اس اتنگ ءِ ہراکہ قومی ایجوکیشن پالیسی نا المی جزومریک۔
