اسلام آباد۔ 20 نومبر (اے پی پی) بنجائی وزیر انسانی حق شیریں مزاری پارینے کہ پاکستان نا آئین چناتے پیدوار حق فراوان کیک، پاکستان چناتا حق انا بارواٹ جہانی کنونشن آ ہم دستخط کرینے، ملک اٹی ہم چناتا حق انا رکھ انا بارواٹی بھاز انگا کانود جوڑ مسنے ولے مخلوق ءِ او کانود تا بارواٹی معلومداری مفننگ نا سوب آن او کانود آتیا عملدرآمد مننگ کتنے۔ ’جہانی یوم اطفال‘‘ نا وخت آ جمعہ نادے آ تینا اسہ بیان اسے ٹی بنجائی وزیر شیریں مزاری پارے کہ 20 نومبر آ مچ آ دنیا ٹی چناتا جہانی دے اڈتننگک۔ اوپارے کہ ملک اٹی چناتا حق انا رکھ اکن بھاز انگا کانود جوڑ مسنے ولے مخلوق ءِ او کانود آتا بابت معلومداری مفننگ نا سوب آن او کانود آتیا پورو وڑاٹ عملدرآمد مننگ کتنے۔ اوپارے کہ ننے قوم انا ذہنیت ءِ بدل کروئی ءِ۔ دارداٹ نن آگاہی پروگرام اس ہم بناکرینن تانکہ مخلوق ءِ زیات آن زیات معلومداری دوئی مننگ کے۔ اوپارے کہ نن زینب الرٹ ایپ انا ہم بناءِ کرینن، اگہ چناسے تون ظلم و بیدادی مریک تو دا ایپ آ دمدستی رپورٹ کننگ مریک۔ اوپارے کہ دا ایپ آزاد کشمیر و گلگت بلتستان تون اوار پاکستان نا ہرضلع ٹی دستیاب ءِ و ہر شاری داایپ آ غاو درج کرفنگ کیک۔ اوپارے کہ اسلام آباد نا دنگ اٹ اولیکو وار چائلڈ ڈومیسٹک لیبر آ پابندی خلنگانے۔ اوپارے کہ نن چائلڈ لیبر سروے نا ہم بناءِ کرینن انتئے کہ ہراوخت اسکان پورو معلومداری ڈیٹانارداٹ دستیاب مفک، ہمووخت اسکان پالیسی سہی وڑاٹ ٹہیفنگ مفک۔ اوپارے کہ حکومت نا پورو کوشست ءِ کہ آئین پاکستان اٹ تروک آ چناتا حق و چناتا رکھ اکن ہراکانود ءِ تیار کننگانے اودے پورو وڑاٹ نافذ کے، داکان بیدس نن تینا جہانی زمواری تے ہم پورو کننگ اُن۔ اوپارے کہ دامسخت کن ننے لس شاری، میڈیا و این جی او تا مخ تفی درکار ءِ تانکہ پاکستان ءِ ہندن ءُ ملک اس جوڑ کننگ مرے ہراڑے چناک تینا تغ ءِ پورو کننگ کیر۔
