اسلام آباد۔ 20 نومبر (اے پی پی) پاکستان چناتا جہانی دے انا وخت آ ہرچنا نا مون آ ہِننگ، ہیل کننگ، گوازی کننگ، و فریشانی، بین، خوف و ظلم آن پاک دوستانہ و رکھ چاگڑد اسے ٹی ولفنگ نا حق انا درشانی ءِ کرسا پارینے کہ چناتا حق انا بابت معاہدہ و اونا اِرا آپشنل پروٹوکول انا حیثیت اٹ پاکستان غٹ چناتا حق انا مون آ دننگ و رکھ ءِ برقرار تخنگ و دا چرجوئی ٹی تینا قومی و جہانی زمورای تے پورو کننگ کن سنبرینگوک ءِ۔ جمعہ نادے آ ترجمان دفترخارجہ چناتا جہانی دے انا بابت پارینے کہ پاکستان صنف، مذہب و نسل نا بنداو آ چناتتون امتیازی سلوک و اوفتا استحصال نا چٹفنگ کن ادارہ جاتی و کانودی گام گیج کرینے۔ نن چناتیا بیدادی، چائلڈ لیبر و جبری برام نا چٹفنگ کن سرینگوک اُن، وخت اس کہ نن داہیت ءِ پک کننگ اُن کہ ملک انا غٹ چناتے کُن و خور، تعلیم، جان جوڑی و جان جوڑ چاگڑد نا حق دُوبرے۔ ترجمان پارے کہ اینخو سال اگست اٹی وزیراعظم عمران خان پسماندہ چناتے خور و غذائیت نا فراوانی کن احساس’’نشونما پروگرام‘‘ نا بناءِ کرے۔ داوخت آ ملک انا 9 ضلع غاتیٹی 22 نشونما ہند کاریم کننگ ءُ وخت اس کہ داسال انا ایسر اسکان، دا پروگرام ءِ 12 ضلع غاتا 52 ہند آتسکان ودفنگک۔ احساس پروگرام نا رداٹ، نیزگاری نا لکیر آن شیف زندءِ تیر کروک آخاہوت آتا چناتے مفت تعلیم ووظیفہ فراوان کننگک۔ دا پروگرام تیٹی مسن تیا خصوصی چکار کننگک۔ ترجمان پارے کہ کوویڈ۔ 19 نا جہانی دین پدتموک ملک آتیٹی چناتیکن کثیر الجہتی چیلنج ءِ تالان کرینے۔ ہراتم خاہوت ءِ ودوک آ وام، بے روزگاری، نیزگاری و ناجوڑی تون مون تروک مرے، تو چنانا نزوری ٹی پین ودکی مریک۔ ترجمان پارے کہ چناتا جہانی دے آ نن مقبوضہ جموں و کشمیر اٹ چناتا حالیت ءِ گیرام کپن۔ داچناک دنیانا غٹ آن بھلا زندان اٹ رہینگ، جہانی برادری خاص کر اقوام متحدہ نا دمدستی چکارنا حقدار ءُ۔ پانزدہ تُو آن زیات مریس جسمانی و ڈیجیٹل گھیڑاٹی اُراتا انہدام، نظربندی و واک انا بے جا کاریم اٹ اتنگ کون آ واقعہ غاک مقبوضہ کشمیر نا چناتے ذہنی اذیت اٹ اختہ و زند، تعلیم و جان جوڑی نا بابت اوفتا بنداوی حق آن محروم کرینے۔ جہانی برادری مقبوضہ کشمیر اٹی مظلوم چناتا حالیت زار نا نوٹس ءِ ہلے و ہندوستان آ زور شاغے کہ او تینا غیر کانودی، غیر انسانی پالیسی و سی آر سی پالیسی تا منافی طرز عمل ءِ دمدستی وڑاٹ بند کے۔
