اسلام آباد۔ 20 نومبر (اے پی پی) وزیراعظم نا خصوصی کمکار جان جوڑی ڈاکٹر فیصل سلطان پارینے کہ حکومت کورونا دین اناارٹ میکو ریسہ تون مون تننگ کن وخت آ رکھی گام گیج کرینے و داڑتون اوار دینی مرض انا منفی زرگزرانی اثرآتے کم کننگ کن المی گام گیج ہم نافذ کرینے تانکہ مخلوق نا جان جوڑی نا رکھ ءِ پک کننگ مرے۔ جمعہ نادے آ نجی ٹی وی چینل تون گپ وتران کرسا اوپارے کہ الس کورونا دین آن بچنگ کن سخت رکھی گام گیج آتیا عمل کتو تو مچ آ ملک اٹی کوویڈ۔ 19 انفیکشن تالان مننگ نا گڑتیک ودنگ کیرہ۔ اوپارے کہ نیشنل کمانڈ اینڈ کنٹرول سینٹر(این سی او سی) بھلو کچ اسے آ السی مچی تیا پابندی نا سلاہ ءِ پیش کرینے و شادی ہال تیکن رکھی گام گیج آتا راہشون اصول ہم جاری کرینے۔ اوپارے کہ السی مچی و برام نا دود آتا اینخو سال 15 ستمبر آ دُوارہ موکل کورونا دین انا تالانی ٹی ودکی نا سوب مس۔ اوپارے کہ برام نا مچی تیٹی ایس او پی تیا سختی اٹ عمل کننگے۔ فیصل سلطان پارے کہ الس نا رکھ حکومت نا اولیت ءِ، ہراشار تیٹی کورونا نا تالانی نا گڑتی زیات ءِ تو ہمو علاقہ غاتیٹی پابندی تے سخت کننگک۔ اوپارے کہ نن شاری تے ماسک بیننگ و جان جوڑی نا رکھی گام گیج آتیان بیدس مچی، السی ہند و دفتر آتیا ہِننگ نا موکل تننگ کپنہ۔ اوپارے کہ کاروباری ہند، شاپنگ مال و ایلو رش والا جاگہ غاتیا ایس اوپی تے گوجالنگ آن دینی ناجوڑی ءِ سوگوی ملنگ کیک۔ اوپارے کہ حکومت ہاٹ لائن اس ہم جوڑ کرینے تانکہ شاریک کورونا دین انا ایس او پی تا خلاف ورزی تا بارواٹ تعلقدار کمامدارآتے وخت آ معلومدار کننگ کیر۔ فیصل سلطان پارے کہ اسکول آتے بند کننگ و چھٹی تا بارواٹی حتمی فیصلہ متنے، کوویڈ۔ 19 انفیکشن نا تازہ حالیت آتا جاچ ءِ ہلنگ کن دیوان 23 نومبر آ مریک۔
