اسلام آباد۔ 20 نومبر (اے پی پی) وزیراعظم عمران خان پارینے کہ حکومت اقوام متحدہ نا کنونشن نا رداٹ چناتا شونداری، تعلیم، جان جوڑی نا خیالداری، اوفتا وقار و سلامتی نا حق انا فراوانی ءِ پک کننگ کن سنبرینگوک ءِ، ساڑی حکومت چناتا حق انا رکھ ءِ پک کننگ کن چندی پروگرام تا بناءِ کرینے، چندی گام گیج آتا کمک اٹ کانود نا حکمرانی و زرگزرانی انصاف نا فراوانی ءِ پک کننگ انگ ءِ۔ حکومت ملک اٹی کوویڈ۔ 19 نا حالیت آتا پدریسہ چاروکی ءِ کننگ ءِ و ہندانا رداٹ مخلوق آ اونا منفی زہم آتے کم کننگ کن صوبائی حکومت و شریداری آتون اواری اٹ ہرممکن جوان گام گیج کننگ ءِ۔ داخیال آتا درشانی ءِ او پنچ شنبے نادے آ یونیورسل چلڈرن ڈے 2020ء نا بابت تینا کلہو اٹی کرے۔ وزیراعظم عمران خان پارے کہ پاکستان اینو جہانی برادری تون اواری اٹ’’یونیورسل چلڈرن ڈے‘‘ 2020 ءِ اڈتننگ ءِ ہرا ننےپاکستان نا آئین، اقوام متحدہ نا انسانی حق انا اعلامیہ و اقوام متحدہ نا کنونشن نا رداٹ چناتا بنداوی حق انا رکھ انا عہد ءِ پک کننگ نا موقع فراوان کیک۔ اوپرے کہ چناک ہرقوم انا غٹ آن نہادی وسیلہ و اونا آخبت نا ضمانت مریرہ۔ حکومت پاکستان تینا چناتا بارواٹی تینا زمواری تیان جوانی اٹ بلد ءِ و اقوام متحدہ نا کنونشن نا رداٹ چناتا شونداری، تعلیم جان جوڑی نا خیالداری، اوفتا وقار و سلامتی نا حق انا فراوانی ءِ پک کننگ کن سنبرینگوک ءِ۔ وزیراعظم پارے کہ ساڑی حکومت چناتا حق انا رکھ ءِ پک کننگ کن چندی پروگرام تا بناءِ کرینے۔ چناتا حق انا رکھ انا بابت قومی کمیشن اس جوڑ کننگانے ہرااوفتا حق انا حالیت آتیا سخت نظر تخانے۔ کمیشن اٹ اِرا چناتے ہم نمائندگی تننگانے ہراٹی اسہ مار و اسہ مسڑ اس اوار ءِ۔ بے گواہ و برمتہ مروک چناتا رکھ اکن ’’زینب الرٹ رسپانس اینڈ ریکوری ایکٹ 2020ء ‘‘ ءِ نافذ کننگانے وخت اس کہ نوعمر چناتا نگہداشت و رکھ اکن ’’جووینائل جسٹس سسٹم ایکٹ 2018‘‘ و ’’آئی سی ٹی چائلڈ پروٹیکشن ایکٹ 2018‘‘ ءِ ہم نافذ کننگانے۔ اوپارے کہ پاکستان تحریک انصاف نا منشور ہم چناتا جان جوڑ غذا، گوازی تیکن دوستانہ چاگڑد، تعلیم نا فراوانی و معذور چناتیکن تین پہ تینی رابطہ غاتے مون آ دننگ نا فراوانی کون ا موقع فراوان کیک۔ ساڑی حکومت غٹ چناتیکن جان جوڑی نا خیالداری، تعلیم نا وڑوڈول اٹ بدلی و ورناتا لائخی تے مون آ اتنگ کون آ پروگرام تا بناءِ کرینے۔ داکان بیدس راجی رکھ انا پنجر اٹ ودکی، کنوئی آ ساف دیر انا فراوانی و آب وہوا نا بدلی کون آ چیلنج آتون مون تننگ ہم حکومتی اولیت آتا بشخ ءِ۔ داکان بیدس مخلوق نا گرج آتا خیال اکن ہم نظام اس جوڑ کننگ انگ ءِ۔ چندی گام گیج آتا کمک اٹ کانود نا حکمرانی و زرگزرانی انصاف نا فراوانی ءِ پک کننگ انگ ءِ۔ حکومت ملک اٹی کوویڈ۔ 19 نا حالیت آتا پدریسہ چاروکی ءِ کننگ ءِ و ہندانار داٹ مخلوق آ اونا منفی زہم آتے کم کننگ کن صوبائی حکومت و شریداری آتون اواری اٹ ہروڑنا جوان گام گیج کننگ ءِ۔ اوپارے کہ حکومت اسہ فلاحی ریاست اس ٹہیفنگ ءِ ہراڑے غٹ شاری تے شفافیت نا ضمانت تننگک۔ حکومت نا ایلو اولیت آتون اوار بیدادی آن پاک راج انا ٹہیفنگ و چناتتون بدسلوکی نا چٹفنگ ہم اولیت ءِ انتئے کہ پاکستان نا آخبت ننا چناتتون تفوک ءِ۔ ای چناتا حق انا رکھ کن تینا عہدءِ پک کیوہ تانکہ او راج و ریاست کن تعمیری باسک و گچین شاری مننگ کیر۔ وزیراعظم پارے کہ کنے یقین ءِ کہ سرکاری تنظیم، سول سوسائٹی نا ادارہ، انسانی حق پڑک، کارپوریٹ، سیکٹر و جہانی شریداری ادارہ غاک اسہ پلیٹ فارم آ اسٹ مریرہ، اسہ گڑاسے ہم بدل کننگ مشکل اف و بھاز زوت نناچناک ہم گچین ولشت، رکھ و ایلو مواقع غاتیان رکھ مریرہ دُن کہ داوخت آ شون ہلوک قوم تا چناتے آسراتی دوئی ءِ۔
