اسلام آباد۔ 19 نومبر (اے پی پی) کراچی سرکلر ریلوائی (کے سی آر) ءِ بحال کننگا، 25 سال آن پد 16 کلومیٹر مریس کے سی آر کراچی نا الس کن رواں دواں کننگا، بنجائی وزیر شیخ رشید احمد کے سی آر نا بناءِ کرے ، اوسیکرٹری ریلوائی سکندر سلطان راجا، سی ای او دوست علی لغاری، ڈی ایس کراچی نثار میمن و ایلو شخصیت آتون اوار کراچی سٹی اسٹیشن آن کراچی کینٹ اسٹیشن اسکان کے سی آر اٹی سفر ہم کرے۔ کے سی آر نا اسہ کوچ آ 90 لکھ روپئی نا خڑچ بسنے، کے سی آر آ 1.8 بلین روپئی خلنگک ہرافتیان 17 ملین روپئی لگانے، 40 کوچ جوڑ کننگانے، داکان مست بنجائی وزیر ریلوائی شیخ رشید احمد پنچ شنبے نادے آ کراچی سرکلر ریلوائی نا بنائی دود آن تران کرسا پارے کہ آخر کار ہمودے بس کہ 25 سال آن پد کے سی آر کراچی نا الس کن رواں دواں کننگانے، اودانا غٹ کریڈٹ ءِ چیف جسٹس آف پاکستان سپریم کورٹ، وزیراعظم عمران خان نا حکومت، حکومت سندھ، پاکستان ریلوائی نا آفیسر و ملازم آتے ترسا پارینے کہ 46 کلومیٹر نا ٹریک آ 16 کلومیٹر کے سی آر نا بشخ مریک۔ اوپارے کہ کوزہ مافیاآن واگزار کرفنگ آن پد اگہ اسہ پلاٹ اس سودا کننگے تو پاکستان ریلوائی نا مچ آ نسخان چٹک۔ اوپارے کہ 14 دسمبر آ کراچی آن میر پور خاص اسکان اسہ پوسکن ءُ ٹرین اس’’مہران ایکسپریس‘‘ چلیفنگک، داٹرین ءِ چلیفنگ نا تاریخ داخاطرآن تفننگک کہ دا پوسکن آ ٹریک ءِ و داڑآ پھاٹک خلوئی ءِ و اومیت ءِ کہ دا کراسنگ آتے 15 دے اٹی پورو کننگک۔ بنجائی وزیر پارے کہ کے سی آر نا کرانا فیصلہ 50 روپئی مسنے ولے ای دادے کم کرسا 30 روپئی کننگ ناپڑو کیوہ۔ اوپارے کہ مزور و خواری کش مخلوق اگہ دانا پاس جوڑ کرفنگ خوار تو اونا فیس 750 روپئی ماہانہ مریک۔ اودااومیت ناہم درشانی ءِ کرے کہ سندھ حکومت کاریم کننگ ءِ۔ اواووربرج و انڈر پاس آتا ٹھیکہ ءِ تسنے۔ اوپارے کہ ٹریک آ اخس کہ گڑا خلوئی ءِ او مچ آ سامانک کراچی آ سرمسنو۔ اوپارے کہ کے سی آر نا ٹریک اٹ 14 کلومیٹر نا پین ودکی 15 دے اٹی کننگک تانکہ داٹی ساڑی لوپ ءِ کورو کننگ مرے۔ اوپارے کہ شکست آتیان بچنگ کن 15 دے اٹی 12 پھاٹک خلنگک، کے سی آر ءِ دے اٹی اِرا وار چلیفنگک اوکان پد داٹی ودکی کرسا دے اٹی 4 وار کننگک و اوکان پد پین ودکی کرسا دادے دے اٹی 10 وار چلیفنگک۔ اوپارے کہ کے سی آر ءِ چلیفنگ نا عمل نا بناءِ ارٹ آن کننگک و 14 تاریخ اسکان اودے چار اپ و چار ڈاؤن کننگک اوکان پد 10 اپ و 10 ڈاؤن کننگک۔ اوپارے کہ کیرج فیکٹری ٹی 40کوچ جوڑ کننگ انگ ءِ ہرافتیان 15 کوچ آتیا مبنی ٹرین اینو چلیفنگ انگ ءِ۔ اوپارے کہ غٹ کوچ آتے پاکستان ریلوائی نا مزور و آفیسر آتے جوڑ کرینن۔ شیخ رشید پارے کہ ریلوائی نا ڈغار تیا بھاز بھلو کوزہ مافیا سے و اوفتے واگزار کرفنگ کن سندھ حکومت کوشست کیک۔
